गृह मन्त्रालयको निर्देशन : सांसद प्रदीप यादव क्वारेन्टाइनमा

आरोहण शाह
वीरगञ्ज २७ चैत : गृह मन्त्रालयको पत्रले संघीय सांसद प्रदीप यादवलाई क्वारेन्टाइनमा राखिएको छ । भारतको क्वारेन्टाइनमा रहेका नेपालीहरुको अवस्था बुझ्न भन्दै पुगेका पर्सा क्षेत्र नं. १ का सांसद प्रदिप यादव सहित दुइ पत्रकारलाई क्वारेन्टाइनमा राखिएको छ । भारतको रक्सौल स्थित क्वारेन्टाइनमा रहेका नेपालीहरुसंग बुधबार भेटन गएका सांसद यादवलाई क्वारेन्टाइनमा राखिएको पर्साका प्रमुख जिल्ला अधिकाकारी बिष्णु कुमार कार्कीले वताउनु भयो । सांसद यादव सहित उहाँसंग सिमापारी गएका २ जना पत्रकार र एक जना ड्राइभर गरी ४ जनालाई सेल्फ क्वारेन्टाइनमा राखिएको अधिकारी कार्कीले जानकारी गराउनु भयो । यस अघि भारतको क्वारेन्टाइन पुगेका सांसद यादवलाई क्वारेन्टाइनमा राख्न माग समेत उठेको थियो । क्वारेन्टाइनमा रहेका नेपालीहरुलाई भेटेर आएपछि यादव सहित उहाँसंग गएका सबै जनालाई क्वारेन्टाइनमा राख्न चैतफी माग उठेको थियो । गृह मन्त्रालयले संघीय सांसद प्रदीप यादवलाई क्वारेन्टाइनमा राख्न निर्देशन दिएको थियो । बिहीबार बिहान गृह मन्त्रालयले जिल्ला प्रशासन कार्यालय पर्सालाई निर्देशन दिँदै सांसद यादवलाई क्वारेन्टाइनमा राख्ने व्यवस्था मिलाउन भनेपछि अहिले सांसद यादव सहित तिन जनालाइ क्वारेन्टाइनमा राखिएको छ । भारतमा संक्रमण तीब्र देखिन सुरु भएताका नै ती नेपालीहरु नेपाल फर्किएका थिए तर लकडाउनका कारण उनीहरु सिमापारी नै रोकिए । भारतीय क्वारेन्टाइनमा रुकुमका १२ जना पुरुष, एक महिला र करिव एक वर्षका बच्चा रहेका छन् । समाजवादी पार्टी नेपालका सांसद यादवले भारतीय क्वारेन्टाइनमा उनीहरुसंग भेटेर फर्किएका थिए । क्वारेन्टाइनमा बसेका व्यक्तिलाई अनधिकृत रुपमा भेटेर फर्किएपछि कानुनले तोकेबमोजिम क्वारेन्टाइनमा राख्ने व्यवस्था गर्न जिल्ला प्रशासन कार्यालय पर्सालाई निर्देशन दिएको थियो । निर्देशन आये लगतै सांसद यादव सहित तिन जनालाई स्वास्थ्य जाच गरि सेल्फ क्वारेन्टाइनमा राखिएको छ ।