महराविरुद्ध अदालतमा मुद्दा दायर गरिँदै, आजै थुनछेक हुने, के होला आदेश ।

काठमाडौँ 

निवर्तमान सभामुख कृष्णबहादुर महरामाथि जिल्ला सरकारी वकिल कार्यालयले आज अदालतमा मुद्दा दायर गर्दैछ। प्रहरीले यसअघि कात्तिक ८ गते अनुसन्धान प्रतिवेदन सरकारी वकिललाई पेस गरेको थियो।

जिल्ला सरकारी वकिल कार्यालयले बिहीवार अभियोगपत्र दायरको तयारी गरेको छ। तिहार बिदा परेकाले प्रतिवेदन अनुसार अभियोगपत्र तयार भइसकेको छैन। बिहीवार नै अभियोगपत्र तयार पारी अदालतमा पेस गर्ने तयारी रहेको कार्यालय स्रोतले जनाएको छ।

दिउँसो १ बजेपछि अभियोगपत्र अदालतमा पेस गर्ने कार्यालयको तयारी छ।

स्रोतका अनुसार महरामाथि प्रहरीको राय अनुसार जबर्जस्ती करणीमा अभियोगपत्र पेस गरिनेछ। यस्तै, सार्वजनिक पद धारण गरेको व्यक्तिबाट कसुर भएकाले मुलुकी दण्ड सजाय ऐन अनुसार थप डेढी सजाय माग हुनेछ।

डेढी सजायसहित महरामाथि कम्तीमा साढे पाँच वर्षदेखि साढे सात वर्षसम्म सजाय मागदाबी हुन सक्नेछ।

प्रहरीले अनुसनधानका सम्पूर्ण प्रमाणहरु सरकारी वकिललाई बुझाइसकेको छ। पछिल्लोपटक अदालतको आदेश अनुसार भएको डिएनए परीक्षणको प्रतिवेदन प्रहरीले बिहीवार नै सरकारी वकिल समक्ष हस्तान्तरण गर्दैछ। प्रहरीलाई उक्त प्रतिवेदन प्राप्त भइसकेको छ।

प्रहरीले घटनास्थलबाट प्राप्त गरेको सबुतको परीक्षण सकिइसकेको छ। परीक्षणका सम्पूर्ण प्रतिवेदन प्रहरीले सरकारी वकिललाई यसअघि नै हस्तान्तरण गरिसकेको छ।

प्रहरीले सबै प्रमाण बिहीवार हस्तान्तरणको तयारी समेत गरेको छ।

‘अभियोगपत्रसाथ आजै अदालतमा उपस्थित गराइँदैछ। बाँकी रहेको परीक्षणका प्रमाणहरु पनि आजै हस्तान्तरण हुन्छ’, महानगरीय प्रहरी परिसर काठमाडौँका प्रमुख उत्तमराज सुवेदीले भने।

असोज १२ गते संसद् सचिवालयमा कार्यरत एक महिला कर्मचारीमाथि बलात्कार प्रयासको महरामाथि आरोप छ। महिलाले प्रहरीमा किटानी जाहेरी दिएपछि असोज १९ गते अदालतको अनुमतिले प्रहरीले महरालाई सभामुख निवास बालुवाटारबाट पक्राउ गरेको थियो।

तीन पटक गरी प्रहरीले महरालाई अनुसन्धानका लागि २५ दिन थुनामा राख्ने अनुमति लिइसकेको छ। उक्त म्याद सकिएको छ। महराले पोलिग्राफ टेस्ट गर्न अस्वीकार गरेका छन्।

बिहीवार अभियोगपत्र पेस भएमा थुनछेक प्रक्रिया पनि प्रारम्भ हुनेछ। थुनछेक बहसपछि अदालतले थुनामा राखेर मुद्दाको पूर्पक्षमा सहभागी हुन वा धरौटीमा रिहाको आदेश गर्न सक्नेछ। साधरण तारेखमा पनि रिहा गर्न सक्नेछ।

पूर्पक्षको लागि थुनामा रहेमा महरा सांसद् पदबाट स्वतः निलम्बित हुनेछन्।