समयमै मनसुन शुरु भएसंगै सुदूरका पहाडी भेगमा रोपाई सुरु, डोटिका ग्रामीण क्षेत्रका किसान दिनभर धानरोप्नमै व्यस्त

 परम्परागत शैलीमा गोरुले नै जोतेरै धान रोपीदै

एकेन्द्र चन्द,डोटी । सुदूरपश्चिमका पहाडी जिल्ला बैतडी दार्चुला बझाङ, डोटी लगायतका क्षेत्रमा यतिबेला धान रोप्ने चटारो छ । समयमै मनसुन शुरु भई पानी पर्न थालेपछि सिँचाइ सुविधा नभएका स्थानमा समेत रोपाई सुरु भएको हो ।

डोटीका जिल्लाका किसान एक सातादेखी नै धान रोप्ने बिउ राख्ने कममा व्यस्त छन् । कोरोना भाइरसको त्रासका कारण जिल्ला बाहिर गएकाहरु गाउँ फर्किएकाले पनि गाउँमा धान रोपाइ सहित अन्य खेती गर्नमा निकै सहज भएको किसानले बताएका छ्न् । शहर गएकाहरु सबै गाउँमा फर्किए संगै गाउँमा बाँझो रहेका जमिनमा खेती हुन थालेको र गाउँनै रमणीय बनेको भन्दै किसानहरु हर्षित छन् ।

विगतको समयमा बाँझो रहेका यहाँका खेतीयोग्य जमिनमा तरकारी तथा रोपाइँ हुन थालेपछि गाउँघरमा हरियाली हुनुका साथै बाँझो जमिन क्रमिकरुपमा साग, तरकारीलगायतका खेतीले हराभरा हुन थालेका छन्।

यता, आधुनिक कृषियन्त्रको प्रयोग बढ्दो क्रममा रहेकाबेला डोटीका ग्रामीण क्षेत्रका अधिकांश भागमा अहिले पनि परम्परागत शैलीमा गोरुले नै जोतेर रोपाइँ गर्ने गरिन्छ । जिल्लामा कूल १० हजार ६ सय ६५ हेक्टर क्षेत्रफलमा धान रोपाइँ हुने गरेको छ ।

कृषि एकाइ केन्द्र डोटीको तथ्याङ्कअनुसार गत वर्ष डोटीमा २२ हजार ४ सय ४४ मेट्रिक टन धान फलेको थियो । यस वर्ष भने त्यो भन्दा राम्रो उत्पादन हुने अनुमान गरिएको छ ।