प्राकृतिक प्रकोपले निम्त्याएको पीडाबाट जनताले मुक्तिको सास फेर्न पाउन्ः पूर्वराजा शाह

काठमाडौं । पूर्वराजा ज्ञानेन्द्र शाहले देशको विभिन्न भागमा बाढी पहिरोले पुर्‍याएको जनधनको क्षतिप्रति दु:ख व्यक्त गरेका छन् ।

पूर्वराजाले आज सोमबार विज्ञप्ति प्रकाशित गरी बाढी, पहिरो र डुबानबाट धेरैले ज्यान गुमाएको, घाइते हुनु परेको र आफ्नो घर, गोठ र जायजेथा गुमाउनु परेको र धेरै घरबारविहीन भएकोमा आफू अत्यन्त दुखित भएको जनाएका हुन् ।

पूर्वराजाले बाढी, डुबान र भूक्षयको जोखिम हुन नदिन रोकथाम र सजगताको निम्ति समयमै ध्यान दिन सके यस्तो क्षति न्यूनीकरणमा योगदान पुग्ने उल्लेख गरेका छन् ।

पूर्वराजाले यो पीडाबाट जनताले मुक्तिको सास फेर्न पाउन भनी ईश्वरसँग प्रार्थना गरेका छन् । उनले घाइतेको शीघ्र स्वास्थ्यलाभको कामना गर्दै शोकाकुल परिवारजनमा समवेदना प्रकट गरेका छन् ।

पूर्वराजाका तर्फबाट सचिवालयले जारी गरेको विज्ञप्ति

यो बर्षको बर्षातको कारण हाम्रो देशको हिमाल, पहाड र तराईका विभिन्न भागमा बाढी, पहिरो र डुबानबाट धेरैले ज्यान गुमाएको, घाईते हुनु परेको, आफ्नो घर, गोठ तथा जायजेथा गुमाउनु परेको र धेरै घरवार विहिन भएको सुन्दा, देख्दा र बुझ्दा म अत्यन्त दुखित भएको छु ।

शोक, वियोग, ब्यथा र वेदनाको यो स्थितिमा सबैबाट सबैको राहत, उद्धार र उपचार होस् । विनासको यो बेला पर्याप्त सहयोग, सुब्यवस्था तथा निगरानी पुगोस् भन्ने मेरो आग्रह छ ।

हाम्रो जस्तो पर्वतीय मुलुकमा बाढी, डुबान र भू–क्षयको जोखिम हरेक बर्ष हुने प्रकृया हो, त्यसैले यसको रोकथाम र सजगताको निम्ति समय मै पर्याप्त ध्यान दिन सके क्षति न्यूनिकरणमा योगदान पुग्नेछ।

प्रतिकूल मौसमी प्रकृतिका कारण उत्पन्न प्रकोप र पीडाबाट जनताले मुक्तिको सास फेर्न पाउन् भन्ने मेरो ईश्वरमा प्रार्थना छ । प्राकृतिक विपदको यो समयमा म शोक सन्तप्त पिडित सबैमा हार्दिक समवेदना व्यक्त गर्दै घाईते भएका सबैको शिध्र स्वास्थ्यलाभको कामना गर्दछु । जय नेपाल २०७७ साल असार २९ गते