झापाको कचनकवलमा सर्पदंश उपचार केन्द्र सञ्चालनमा आउदै

झापा । झापाको दक्षिणी भेगमा रहेको कचनकवलमा सर्पदंश उपचार केन्द्र चाँडै सञ्चालनमा आउने भएको छ ।

जसअन्तर्गत सर्पदंश उपचारका सम्भावित विषयहरु अध्ययन गरी प्रतिवेदन तयार पारिएको छ ।

सर्पदंशका विषयमा लामो समयदेखि खोज अनुसन्धान गरिरहेका कचनकवलका युवा प्रकाश काश्यपले प्रतिवेदन तयार पारेका हुन् ।

गाउँपालिकाको विभिन्न क्षेत्रमा गएर तयार पारिएको “कचनकवलमा सर्पदंश उपचार केन्द्र आवश्यकता एवं औचित्यता” विषयको प्रतिवेदन गाउँपालिकाले बुझेसँगै सर्पदंश उपचार केन्द्रको काम अघि बढ्ने भएको हो ।

गाउँपालिकामा सर्पको टोकाइमा पर्ने र सर्पदंशका कारण अकालमा ज्यान जानेको संख्या कम गर्न गाउँपालिकाले सर्पदंश उपचार केन्द्र स्थापना गर्ने घोषणा गरेको थियो । सोही अनुरुप गाउँपालिकाले युवा अनुसन्धानकर्ता कश्यपलाई गएको फागुनमा प्रतिवेदन तयार पार्ने जिम्मा दिएको थियो ।

आइतबार प्रतिवेदन बुझ्दै गाउँपालिका अध्यक्ष अञ्जरा आलम सर्पदंश उपचार केन्द्र सञ्चालन गर्ने परिकल्पना गाउँपालिकाबासीको भावना अनुरुप सुरु गर्न लागिएको बताए ।

‘अब छिट्टै नै हामी यसका माध्यमबाट जनतालाई सेवा दिई सर्पदंशको भयबाट मुक्ति प्रदान गर्ने दिशामा कार्य अगाडी बढाउँछौ,’ अध्यक्ष आलमले भने ।

यता प्रतिवेदक काश्यपले कचनकवलमा मानिसहरुको अकाल मृत्युको एक प्रमुख कारण सर्पको टोकाइ रहेको भन्दै घट्ना न्यूनीकरणका लागि पनि उपचार केन्द्र आवश्यक रहेको बताए ।

"काश्यपले गाउँपालिकाबासी सर्पको त्रासका बसिरहेको भन्दै जतिसक्दो चाँडो सर्पदंश उपचार केन्द्र सञ्चालनमा ल्याउनु पर्ने सुझाव आफूले प्रतिवेदनमार्फत दिएको बताएका छन् । ‘सर्पको टोकाइ र यसले सृजना गरेको त्रासदी झनै भयावह छ भन्ने कुरा मेरो खोजले देखाएको छ । जुन प्रतिवेदनमा आधारित तथ्यांकहरुले पनि बताउँछ,’ काश्यप भन्छन्,’म यसको लागी सामान्य अनुसन्धान गरिरहेको थिएँ, पछि गाउँपालिका र यस क्षेत्रमा स‌ंघीय सांसद राजेन्द्र लिङ्देनले हार्दिकताका साथ यो परिकल्पनालाई अगाडी बढाउने दिशामा कार्य गरेर मलाई जिम्मेवारी सुम्पिनु भएको छ । यो कार्य सतप्रतिशत सफल हुने कुरामा कुनै सन्देह छैन्।”

यता सांसद लिङदेनले पनि सर्पदंश उपचार केन्द्र आफ्नो प्रतिबद्दतामा परेको विषय रहेको भन्दै यसको सफलताका निम्ति प्रयास गरिरहेका बताए । ‘तयारी निकै अगाडी बढेको भएपनि कोभिड(१९ का कारणले केही समय कार्य अगाडी बढ्न सकेको थिएन। अब भने यसको बाँकी कार्य अगाडी बढाइने छ,’ उनले भने।

गाउँपालिकाले तत्कालका लागि बनियानीको प्राथमिक स्वास्थ्य केन्द्रकै केही कोठालाई सर्पदंश उपचार केन्द्रको रुपमा प्रयोग गर्न लागेको छ ।

खबरमञ्च