धनगढी । अबिरल वर्षा र त्यससँगै आएको बाढीका कारण कैलालीमा ६ हजार घर डुबानमा परेका छन् । दुई हजार परिवार विस्थापित भएको छन् ।
जिल्ला प्रशासन कार्यालय कैलालीका अनुसार बाढीबाट सबैभन्दा बढी जोशीपुर गाउँपालिका र भजनी नगरपालिकाका बस्ती प्रभावित भएका छन् । भजनीमा दुई हजार एक सय ८० परिवार बाढीबाट प्रभावित भएको जिल्ला प्रशासन कार्यालय कैलालीले जनाएको छ ।
यस्तै, जोशीपुर गाउँपालिकामा दुई हजार तीन सय १५ परिवार डुबानमा परेका छन् । त्यस्तै, जानकी गाउँपालिकामा एक हजार र टीकापुर नगरपालिकामा ८ सय २५ परिवार डुबानमा परेका जिल्ला प्रशासन कार्यालय कैलालीले जनाएको छ ।
टीकापुरमा बाढीले ५६ घर भत्किएका छन् । डुबानमा परेका परिवारको उद्धारका लागि नेपाल प्रहरी, सशस्त्र प्रहरी र नेपाली सेनाको टोली खटिएको कैलालीका प्रमुख जिल्ला अधिकारी यज्ञराज बोहराले बताए । विस्थापित परिवारलाई विद्यालय तथा हुलाकी सडकमा राखिएको छ । यस्तै कैलालीमै बाढीमा परी वेपत्ता भएका तीन जनाको खोजी कार्य जारी छ ।
यता, बाढीमा बगेका कैलालीका तीनजनाको सकुशल उद्धार गरिएको हो भने तीनजना अझै बेपत्ता छन् । कैलालीको भजनी नगरपालिका–८ खौरपुरका ४० वर्षीय ईश्वर शाह, ३३ वर्षीय चक्र बिक र जनकपुरका ११ वर्षीय स्केल चौधरी बेपत्ता भएको ईलाका प्रहरी कार्यालय भजनीले जनाएको छ ।
पथरैया र कान्द्रा नदीको बाढी गाउँमा पसेपछि उनीहरू बगेको जानकारीमा आएको छ । बुधबार दिउँसो खोलामा बगेर बेपत्ता भएका भजनी–८ कै ४० वर्षीय बलराम चौधरी, बिक्की शाही र हेमन्त शाहीलाई भने प्रहरीको टोलीले सकुशल उद्धार गरेको छ ।
बुधबार रातभरि र बिहीबार बिहान पनि वर्षा जारी भएकाले उद्धारका लागि समस्या भएको जिल्ला प्रहरी कार्यालय कैलालीले जनाएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
