दलहरुले भोट बैंकको रुपमा प्रयोग गरे मुसहर समुदाय ।

सिराहा
सिरहाको गोलबजार नगरपालिका १० स्थित धोवियाधारमा रहेका ४० घरपरिवार मुसहर समुदाएको चिसोले जनजीवन प्रभावित भएको छ । हुस्सु र शितलहरले तराइनै चिसिएको बेला वस्तिका स्थानीयहरु जाडोले कठ्याङ्ग्रिएका छन् ।
तीन छोरी र श्रीमति सहित पाँच जनाको परिवार रहेका लालदेब सदाय खरले बारेको छाप्रोमा बस्छन् । मुस्किले चिसो शिरेटो छेक्ने छाप्रोभित्र चिसो भुईमा परालमा लागइएको उनिहरुको ओछ्यान कहिले तात्ने उपाय नै छैन । बालबच्चा रातभरी जाडोले कठाङग्रीदै रुन थालेपछि आगो तापेर रात बिताउनु परेको उनिहरुको गुनासो छ ।
लालदेव मात्र हैन बस्तिका सवैजसो समुदायको अवस्था उस्तै छ । लालाबाला सहित ५ जनाको परिवार रहेको बुधनी सदाय बाँसले उभ्याइएको र खरले छाएको छाप्रोमा बस्छन् । श्रीमान दिनभरी अरुको घरमा काम गर्ने र उतै रक्सिले मातिएर बस्ने भएपछि परिवार एक्लो बुधनीको कमाईले चलेको छ । उनले न राम्रो घर बनाउन सकेको छ नत न्यानो कपडाकै जोहो गर्न नै ।
निर्वाचनताका ठूला ठूला सपना बाढेका नेताहरु शितलहरको शास्ति खेपिरहेको बस्तिमा कहिल्यै देखा परेनन् । राजनीतिक दलका नेताहरुले आफूलाई भोट बैंकको रुपमा प्रयोग गरेको उनिहरुको भनाइ छ । जाडोले बस्तिका बालबालिका अनि वृद्धवृद्धा अप्ठ्यारोमा परेको भएपनि कहि कतैबाट सहयोग नआएको उनिहरुको दुखेसो छ ।
सिरहाको विभिन्न टोलमा गरी करिव ५० हजारको हाराहारीमा मुसहर समुदायहरुको बसोवास छ । ९८ प्रतिशत भूमिहीन रहेको मुसहर समुदाय आर्थिक अवस्था कमजोर भएकै कारण प्राकृतिक प्रकोपबाट समेत पीडित हुनु परेको छ ।