काठमाडौं । पूर्वराजा ज्ञानेन्द्र शाहले महामारी र विपद्को घडीमा सबै मिलेर यसको न्यूनीकरणमा लाग्नु पर्ने बताउनु भएको छ।
कोरोनाले आक्रान्त भइरहेको समयमा बाढी पहिरो नदी कटान जस्ता विपत्ति आइपरेको भन्दै पूर्व राजा शाहले विज्ञप्ती निकाल्दै सरकारलाई उद्धार र राहतको प्रभावकारी व्यवस्थापन गर्न आग्रह गर्नु भएको हो ।
शाहले वर्षायाम शुरूवात भएसंगै देशका विभिन्न स्थानमा गएको बाढी पहिरो लगायतका प्राकृतिक प्रकोपले ठूलो धनजनको क्षती भएकोप्रति आफ्नो गम्भीर ध्यानाकर्षण भएको भन्दै पिडितको उद्धार र राहतका काममा राज्यका सम्पुर्ण संयन्त्रलाई प्रभावकारी परिचालनमा जुट्न आग्रह समेत गर्नुभएको छ । उहाँले बिपदमा परि ज्यान गुमाउनेप्रती श्रद्धाञ्जली व्यक्त गर्दै पीडितको शिघ्र स्वास्थ्य लाभको कामना समेत गर्नुभएको छ ।
पूर्व राजा शाहद्धारा लेखिएको विज्ञप्ती जस्ताको तस्तै,
पूर्व श्री ५ महाराजाधिराज ज्ञानेन्द्र वीर विक्रम शाहदेवबाट
प्राकृतिक विपत्तिप्रति गहिरो चिन्ता र चासो ब्यक्त
देश कोभिड १९ को महामारीबाट आक्रान्त भइरहेको समयमा फेरि बाढी, पहिरो, नदी कटान जस्ता प्राकृतिक विपत्ति हामी कहाँ आईपरेको छ । हिमाल, पहाड र तराईका धेरै जिल्लाहरुमा कतिपय जनधन तथा भौतिक निर्माणमा क्षति भएको एवम् ग्रामीण तथा शहरी वस्तीका बासिन्दाहरुको उठीबास भएको दुःखद खबर सुन्दा, देख्दा हामीलाई दुखित तुल्याएको छ । मनसुन प्रारम्भ मात्र भएको यो समयमा नै यति धेरै क्षति हुन पुग्यो भने तिब्र बर्षात आउने समयमा अझ के के हुने हो ? यस्तो बेलामा सबै मिलेर महामारी र प्राकृतिक विपत्तिको न्यूनिकरण गर्ने तर्फ जिम्मेवार बन्नु पर्ने हुन्छ । प्राकृतिक विपत्ति सबैको चिन्ताको बिषय भएकोले पूर्व सावधानी राख्ने, तयारी गर्ने, सजगता अपनाउने र उद्धार एवं राहतकारी व्यवस्था मिलाउने बिषयमा सबै पक्षको गम्भिर ध्यान जानु पर्ने देखिन्छ । अवस्था विकराल नहोस, अपार क्षति नहोस् र जनकल्याणकारी प्रबन्ध प्रभावकारी रुपमा होस भन्ने हाम्रो आग्रह छ ।
जय नेपाल
२०७८ साल आषाढ ३ गते
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
