हुम्लामा हावाहुरी : हवाई उडान अवरुद्ध, जनजीवन प्रभावित

हुम्ला / शनिबार रातिदेखि लगातार हावाहुरी चल्दा हुम्ला सदरमुकाम सिमकोटको जनजीवन प्रभावित भएको छ।आइतबार पनि दिनभर हावाहुरी चल्दा सिमकोटको जनजीवन प्रधावित बनेको हो। हावाहुरीले आवतजावत्मा समेत निकै कठिनाइ भएको छ।

हावाहुरीको कारण अन्तर जिल्ला जोड्ने हुम्लाको एक मात्रै हवाई सेवासमेत बन्द भएको छ। सडक सञ्जालमा नजोडिएको हुम्लाबाट अन्तर जिल्ला जोड्ने एक मात्रै यातायातको साधन हवाईसेवा हो। हावाहुरी चल्दा आइतबार कुनै पनि उडान हुन नसकेको सिमकोट विमानस्थल स्रोतले जानकारी दिएको छ।

हावाहुरीका कारण नेपालगञ्जबाट उडान हुननसकेको हो । हवाई उडान नहुँदा आइतबार दैनिक उपभोग्य खाद्यान्न ढुवानी हुन सकेन। यस्तै जिल्लाबाहिर जाने यात्रु सिमकोटमै रोकिएका छन् भने जिल्लाबाहिर हुम्ला पुग्ने यात्रुसमेत नेपालगञ्जमै रोकिएका हुन्।

दिनभर चलेको हावाहुरीले सदरमुकाम सिमकोट तल्लो बजारमा रहेको मानसरोवर बहुमुखी क्याम्पसको छानोसमेत उडाएको छ। हावाहुरीले छानो उडाएपछि कक्षा कोठामा क्षति पुगेर पठनपाठनमा असर पर्ने देखिएको छ।

क्याम्पास भवनको छानो उडाएपछि प्रहरी घटनास्थलमा पुगेर क्षतिको मुचुल्का तयार पारेको जिल्ला प्रहरी कार्यालय हुम्लाले जानकारी दिएको छ।

हावाहुरीको कारण क्याम्पसमा सात लाख बराबरको क्षति पुगेको प्रहरीको आकलन छ। क्याम्पसमा मानविकी, व्यवस्थापन र शिक्षा सङ्कायको पठनपाठन हुने गरेको छ।कोरोना महामारिपछि भने भौतिक उपस्थितिमा पठनपाठन हुनसकेको छैन । हावाहुरीका कारण सिमकोटमा चिसो अत्याधिक बढेको छ।