सुनसरी । देवानगन्ज गाउँपालिका– ६ कृषक आन्दोलित भएका छन् । राजगन्ज कृषि सहकारी संस्था लिमिटेडका कर्मचारीहरूले मलखाद नदिएको भन्दै उनीहरू आन्दोलित भएका हुन् ।
आफूहरूलाई सहकारीले मलखाद नदिएको भन्दै कृषकले राजगन्ज कृषि सहकारी संस्थामा तालाबन्दी गरेका छन् । त्यहाँका कर्मचारीले स्थानीय किसानहरूलाई मलखाद नदिएर अन्य स्थानका किसानलाई नेपाल सरकारले तोकेको मूल्यभन्दा बढी लिएर बचेको उनीहरूको आरोप छ ।
स्थानीय विजय मेहताका अनुसार उक्त सहकारी संस्थाले त्यहाँ सदस्य भएका कृषकलाई पनि मलखाद नदिएर बाहिरका किसानलाई बढी मूल्य लिएर बेचिरहेको छ । सहकारीले मल नदिएर दुःख दिएका कारण आन्दोलित हुनुपरेको उनले बताए ।
सोमबार साँझ सहकारीमा मल लिन जाँदा सहकारीले छैन भनेर रित्तै हात फर्किएको अर्का कृषक मनिलाल खत्वेले बताए । सहकारीमा मल हुँदाहुँदै पनि छैन भनेर फर्काएको उनको भनाइ छ । सहकारीले बाहिर महँगो मूल्यमा मल बेचेर स्थानीय कृषकलाई समस्यामा पारेको उनको गुनासो छ । सहकारीको सदस्य हुँदा पनि मल नपाएका कारण तालाबन्दी गर्न बाध्य भएको उनले सुनाए । उनले भने, ‘म मल लिन जाँदा छैन भनेर सहकारीले फर्कायो, तर अर्काे व्यक्तिलाई भने दिएर पठायो ।’
यता सहकारी संस्थाका अध्यक्ष जयनाथ मेहताले कर्मचारीले यस्तो गरेका रहेछन् भने कारबाही गरिने जानकारी दिए । उनले भने, ‘हामी बैठक बसेर के भएको रहेछ बुझ्छौँ, त्यस्तो पाइएमा कारबाही गर्छौं ।’
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
