कोरोनाको मिलेर सामना गरौं -राजेन्द्र लिङ्देन

प्रिय स्थानीय तहका जनप्रतिनिधि साथीहरु ! अहिले एउटा ठूलो चुनौतीको सामना गरिरहेका छौं। यो चुनौती केवल कुनै व्यक्ति,जाति,पार्टी,समाज र देशका विरूद्ध नभएर मानव सभ्यता माथिको चुनौती हो, यसलाई मिलेर सामना गर्नुको विकल्प छैन।

हालसम्म कोरोना भाईरसको औषधी नभएको र हाम्रो देशको सन्दर्भमा त कोरोना भाईरस जाँच्ने सामाग्री,जाँच्ने डाक्टरले लगाउने सुरक्षा सामाग्री जस्ता अत्यावश्यक बस्तुहरु पर्याप्त मात्रामा नभएको र भएको सामाग्रीको पनि गुणस्तरमा प्रशस्त प्रश्नहरु उठिरहेका छन। यस्तो बेला सरकारको निर्देशन पालना गरेर लक डाउनमा बस्नुनै एकमात्र विकल्प हो।

लक डाउन जति लम्बिदै जाँदैछ त्यतिनै दैनिक ज्यालामजदुरी गरिखाने दिदीबहिनी दाजुभाइको जिवन कष्टकर बन्दै गइरहेकोछ । यस्तो बेला मानव सभ्यतालाई बचाउने नाममा कसैले भोकै मर्नु नपरोस। तपाईहरूलाई थाहा छ अहिले टाढाबाट चाहेर पनि कुनै दाताहरु तपाईको घरगाउँमा आउन सक्दैनन, आउनु उचित पनि होईन र सरकारले आफूखुसी राहत वितरणमा रोक पनि लगाएको छ ।

अहिले जनताको सबैभन्दा नजिकको मान्छे,भगवान,प्रभु,परमेश्वर जे भने पनि तपाईहरुनै हो । खबरहरु आईरहेका छन। बिस्तारै गरीबका चूला जल्न छाडेका छन। यस्तो बेला हिजो तपाईलाई कसले भोट दियो या दिएन अथवा तपाई वा उ कुन पार्टीको हो यी सबै छोडिदिनुहोस । नअल्मलिनुहोस र तत्काल बन्दोबस्त मिलाएर राहत घरघर पुग्ने ब्यबस्था मिलाउनुहोस।

यस काममा चाहे तथ्यांक लिनहोस या वितरणमा टोल बिकास संस्थाको सहयोग लिनुभयो भने अझ प्रभावकारी हुनेछ। पक्षपात,दुरूपयोग र सामग्री खरीदमा अनियमितता र भ्रष्टाचार जस्ता कुराहरू सुन्न नपरोस । मानवता नमरोस !
राजेन्द्र लिङदेन
सदस्य प्रतिनिधिसभा