जसले देश निर्माण गर्यो उसैलाई दोस लगाउनु उचित होईन- सांसद लिङ्देन

देशभन्दा माथि केही छैन, हाम्रो पार्टीको संविधान संशोधन विधेयकमा निशर्त समर्थन रहेको छ ।

काठमाडौं । राप्रपा सांसद राजेन्द्र लिङ्देनले नेकपा अध्यक्ष पुष्पकमल दाहाल प्रचण्डको बोली प्रति असन्तुष्टि जनाएका छन् । सांसद लिङ्देनले
प्रतिनिधिसभाको बैठकमा संविधान संशोधन विधेयकको छलफलमा भाग लिँदै प्रचण्डले राजतन्त्रमा गुमेको भूमी गणतन्त्रमा फिर्ता लिने अवसर मिलेको भन्ने अभिव्यक्ति प्रति आपत्ती जनाएका हुन् ।
“जसले देश एकीकरण गर्यो, नामाकरण गर्यो, उनीहरुलाई नै दोष लगाएर कसैले गुमाएको हामीले लियौं भन्ने दिन होइन आज, उनले भने ।

यस्तै उनले संविधान संशोधनको विषयमा बोल्दै भने, देशभन्दा माथि केही छैन, हाम्रो पार्टीको संविधान संशोधन विधेयकमा निशर्त समर्थन रहेको छ ।,

सांसद लिङ्देनले संविधानका आधारभूत तहमा आफू र पार्टीको केही बिमति रहेपनि राष्ट्रपय स्वाधिनताको विषयमा कुनै शर्त नरहेको बताए । “यो संविधानको आधारभूत तहमै हाम्रा केही विमति छन् । तर यो प्रस्ताव दल विशेषको होइन, मुलुकको हो , त्यसैले राष्ट्रियताको विषयमा कुनै शर्त छैन, इन्तु परन्तु पनि छैन । किनकी सबैभन्दा माथि देश छ , देशभन्दा माथि केही छैन,” उनले भने ।

आकारले आफ्नो दल सानो भएपनि सरकारले ल्याएको संशोधन विधेयकमा सबैभन्दा पहिला समर्थन गर्ने पनि राप्रपानै भएको उनको भनाइ थियो ।

यसबाहेक उनले नक्सा जारी गर्ने र संविधान संशोधन गर्ने ऐतिहासिक दिनको नेतृत्व लिने प्रधानमन्त्री केपी शर्मा ओलीलाई समेत धन्यवाद दिए । ” तर नक्सा पारित गरेर मात्र हुँदैन, भूमि फिर्ता लिन वार्ता गर्नुपर्छ । कठिनाइ छ, जटिलता छ । तर असम्भव छैन,” उनले भने ।