उपचार नपाएर रुकुम सोती घटनाका घाइतेहरु छट्पटाउदै

जाजरकोटका सिडिओ भन्छन, उपचारका लागि रुकुमलाई सोध्नुपर्छ

लोकेन्द्र विश्वकर्मा, जाजरकोट । जेठ १० गते राती रुकुम पश्चिमको सोतीमा भएको जातीय नरसंहारको घटनाका घाइते उपचार नपाएर समस्यामा छन् । आर्थिक अवस्था कमजोर भएका उनीहरु उपचारको पखाईमा रहेपनि सरकारले भने बेवास्ता गरेको छ । घटना घटेको एक महिना पुग्नै लागेपनि सरकारले निःशुल्क उपचार गर्नुको साटो सम्बन्धित निकाय एकले अर्कोलाई दोष देखाउँदै पन्छिरहेका छन् ।

जेठ १० गते राती रुकुम पश्चिमको सोतीमा भएको घटनामा जाजरकोटका १२ जना युवाहरु घाइते भएका थिए । घाइते मध्येको केही अवस्था सामान्य भएपनि धेरैको टाउको, अनुहार र छातीमा चोट लागेको छ । घटनामा जाजरकोट रानागाउँका नवराज विकसहित ६ जनाको हत्या भएपनि अरु भागेर बाच्न सफल भएका थिए । तर उनिहरु उपचार नपाएर छट्पटाई रहेका छन । घाइते इन्द्रजंग शाह भन्छन्, जाजरकोटको प्रशासनले रुकुमलाई सोध्नु पर्छ भन्छ् । रुकुमले झन के सुन्थ्यो र ?

इन्द्रको मात्रै होइन, नवराजसँगै सोती गएर घटनामा परी घाइते भएका सुदीप खड्काको अवस्था पनि उस्तै छ । महिनौ बितिसक्दा पनि उपचार त भएको छैन नै । उपचारका लागि कसैले पहल पनि गरको छैन । भाग्ने क्रममा पीडकले हतियाले हानेर चोट लाग्दा हिड्न समेत गाह्रो भएको सुदीपको भनाई छ ।

घाइतेहरु उपचार नपाएर छटपटिएका बेला जाजरकोटका प्रमुख जिल्ला अधिकारी भने यस विषयमा बेखबर छन् । उनि रुकुम सोती घटनाको थप अनुसन्धानका लागि बनेको ९ सदस्यीय संसदीय छानबिन समिति संग भेटेपछि मात्रै बोल्न मिल्ने भन्दै पन्छिन्छन् ।

अन्तर्जातीय विवाहका लागि युवतीलाई भगाउन गएका जाजरकोट रानागाउँका नवराज विक, लोकेन्द्र सुनार, सन्दीप विक, गोविन्द शाही, टीकाराम सुनार, गणेश बुढामगरको हत्या भएको थियो । प्रहरीले घटनामा सलंग्न युवतीका बुवाआमा र वडाध्यक्ष डम्बर मल्लसहित १८ जनालाई पक्राउ गरेर ज्यानमारा उद्योगमा मुद्दा चलाएको छ । तर घाइतेहरु उपचार नपाएर छटपटिरहेका छन् ।