ललितपुर । कृत्रिम बौद्धिकता (एआई) को द्रुत विकाससँगै बदलिँदो सञ्चार परिदृश्यमा पत्रकारहरूलाई प्रविधिमैत्री र प्रतिस्पर्धी बनाउने उद्देश्यले ललितपुरमा आयोजित तीनदिने विशेष कार्यशाला शुक्रबार सम्पन्न भएको छ ।
सञ्चार रजिस्ट्रार कार्यालय, बागमती प्रदेशको आयोजनामा जावलाखेलमा सञ्चालित ‘पत्रकारितामा एआईको उपयोग’ विषयक उक्त कार्यशालामा प्रदेशका २५ भन्दा बढी क्रियाशील सञ्चारकर्मीहरूको सहभागिता रहेको थियो । प्रविधिले पत्रकारिताको स्वरूप फेरिरहेका बेला समाचार कक्षलाई अझ छिटो, तथ्यपरक र विश्वसनीय बनाउने व्यावहारिक सीप सिकाउन कार्यशाला आयोजना गरिएको हो ।
समापन समारोहलाई सम्बोधन गर्दै बागमती प्रदेश आन्तरिक मामिला, कानुन तथा सहकारी मन्त्रालयका सचिव महेश भट्टराईले आधुनिक प्रविधिको उच्चतम प्रयोगसँगै पत्रकारिताको आधारभूत गुणस्तर र विश्वसनीयता कायम राख्नु आजको मुख्य चुनौती र आवश्यकता रहेको बताउनुभयो ।
कार्यक्रममा बागमती प्रदेशका सञ्चार रजिस्ट्रार रेवती सापकोटाले प्रविधिलाई पत्रकारको विकल्पका रूपमा नभई एक सशक्त सहयोगी औजारका रूपमा लिनुपर्नेमा जोड दिनुभयो । “एआईले पत्रकारलाई चलाउने होइन, बरु पत्रकारले एआईलाई आफ्नो विवेकले चलाउन सक्नुपर्छ,” उहाँले भन्नुभयो, “प्रविधिको सदुपयोगसँगै यसको दुरुपयोगबाट निम्तिन सक्ने जोखिम र भ्रामक सूचनाप्रति सञ्चारकर्मीहरू सधैँ सचेत रहनुपर्छ ।” तीन दिनसम्म चलेको कार्यशालामा गोरखापत्र दैनिकका सह–सम्पादक अजय शर्मा र ‘अडियो भिजुअल इन्डलेस सोलुसन’ का अध्यक्ष एवं वरिष्ठ दृश्य सम्पादक शिव पुरीले मुख्य प्रशिक्षकका रूपमा सहजीकरण गर्नुभएको थियो ।
प्रशिक्षकद्वयले एआईको व्यावहारिक प्रयोग, सामग्री निर्माण र नीतिगत आचारसंहिताका विविध पक्षमा प्रशिक्षण दिनुभएको थियो । तीन दिनसम्म चलेको उक्त कार्यशालामा सहभागी पत्रकारहरूलाई प्रविधिको आधारभूत ज्ञानदेखि व्यावसायिक सामग्री उत्पादन र तथ्य जाँचसम्मका विभिन्न चरणमा व्यवहारिक प्रशिक्षण प्रदान गरिएको थियो । कार्यशालाको पहिलो दिन एआई प्रविधि र वर्तमान डिजिटल टूल्सहरूको परिचयसँगै एआईबाट सही र सटीक नतिजा निकाल्न प्रभावकारी ‘प्रम्प्ट’ लेख्ने कलाबारे प्रशिक्षण दिइएको थियो ।
दोस्रो दिन प्रम्प्टको सहायताले तथ्यमा आधारित समाचार लेखन, बुलेटिन तयारी र रिपोर्टिङमा हुने प्राविधिक सहजीकरणबारे सिकाइएको थियो । सोही दिन भ्वाइसओभर, अडियो प्रशोधन, सङ्गीत तथा प्रोमो निर्माणसँगै ‘फ्याक्ट–चेकिङ’ र ‘डिपफेक’ ) पहिचान गर्ने व्यावहारिक अभ्याससमेत गराइएको थियो ।
त्यस्तै, कार्यशालाको तेस्रो तथा अन्तिम दिन दृश्य सामग्री निर्माणका लागि आवश्यक क्यामेरा सञ्चालन, फ्रेम, रेजोलुसन र ध्वनि (साउन्ड) समायोजनबारे सिकाइएको थियो । साथै, आधुनिक एआई टूल्सहरूको प्रयोग गरी फोटो तथा भिडियो सम्पादन (एडिटिङ) गर्ने र एआई निर्मित दृश्य–तस्बिरको प्रमाणीकरण गर्ने सीपबारे अभ्यास गराइएको थियो ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved