सेल्फीरोड “कोरोना कहर भन्दा ठुलो मनको रहर” (फोटो फिचर)

कुमार खड्का, मोरङ । मोरङको पथरीशनिश्चरे सेल्फी सडक यतिवेला निकै चर्चामा आएको छ । सामाजीक संजाल टिकटकमा भिडियो बनाउनेहरुको भिडका कारण यो सडक चर्चामा आएको हो ।

तस्वीरमा देखिएको कुनै जात्राको भिड होइन, न त यहाँ वनभोज, पार्टी, सेमिनार नै भइरहेको छ । तर पनि सडकभरी भिड देखेर तपाईलाई अचम्म लाग्न सक्ला । तर, अचम्म नमान्नुस किनकी अचेल पथरीशनिश्चरे सडकमा दैनीक मानीसको भिडभाड नै यस्तै नै हुन्छ ।

सामाजिक संजाल टिकटकबाट एका–एक चर्चामा आएको पथरीशनिश्चरे २ को सेल्फी रोड यतिवेला “कोरोना कहर भन्दा ठुलो मनको रहर” नै वनेको छ । कोरोना कहरका कारण ४ महिना सम्म लुकेर वसेका मानिसहरु, लकडाउन केही खुकुलो भएसँगै ३ साता यता देखि मनको रहर पुरा गर्न सेल्फी रोड पुग्ने गरेका छन् ।

पूर्व–पश्चिम राजमार्गको सुनझोरा पूल पश्चिम पट्टिबाट दक्षिणतर्फ लाग्ने ११ सय मिटर लामो कालोपत्रे सडक साँच्ची कै सुन्दर देखिन्छ । सडकको पूर्व पश्चिम चौतारी सामुदायिक वनले हुर्काएको एक नासका सालका बिरुवाको खुला जङ्गल सगै चिल्लो कालोपत्रे सडकमा लिएका तस्वीरहरुले सवैको मन लोभ्याउने गरेको छ ।

आर्कषणवाट प्रभावित वनेर दैनिक हजारौ मानिसहरु यो रोडमा भेला भएर टिकटक वनाउन र फोटो खिच्न आउन थालेपछि पथरी, मंगलवारे र उर्लावारीका केही व्यापरीको ठेला व्यापार पनि फस्टाएको छ । यस क्षेत्रलाई विकास गरेर आर्कषक केन्द्र बनाउने तयारी भइरहेको वडा नम्वर २ का अध्यक्ष यामप्रसाद गुरागाईको भनाइ छ ।

यस्तो असावधानीपूर्ण वाक्लो उपस्थितीले कोरोना फैलन सक्ने डर त छदै छ सडकमै रहेका ठेला व्यापारी अनि रफतारमा हुईकिएका मोटरसाइकल र टेम्पोहरुको वेगमा कलिला नानीहरु दुर्घटनामापर्ने उच्च जोखिम पनि बढेको छ । दुर्घटनाको उच्च जोखिमलाई न्यूनीकरण गर्न स्थानीय सरकारले कुनै कदम चालेको देखिदैन ?