राष्ट्रिय सभाको सदस्यमा हिमानी शाहलाई प्रस्ताव

काठमाडौं । राष्ट्रिय सभाको रिक्त एक सदस्यमा केही समयअघिबाट शाही परिवारकी हिमानी शाहलाई मनोनित गर्न लबिङ् हुन थालेको छ । सरकारको सिफारिसमा राष्ट्रपतिद्वारा मनोनित गरिने राष्ट्रिय सभाको उक्त कोटामा समाज सेवामार्फत मुलुकलाई योगदान गरेको आधारमा पूर्वयुवराज्ञी शाहलाई मनोनित गर्न लबिङ भइरहेको स्रोतले बताएको छ ।

यसमा नेकपाका अध्यक्ष तथा प्रधानमन्त्री केपी शर्मा ओली सकारात्मक रहेको स्रोतले उल्लेख गरेको छ । सुरुमा सरकारका तर्फबाटै यस्तो प्रस्ताब गएको स्रोतको दाबी छ । ‘हिमानीले के गर्छिन भन्ने उनको स्वतन्त्रताको कुरा भयो । तर उनले स्वीकृति दिइन भने राष्ट्रिय सभाको सदस्य बन्ने संभाबना प्रबल छ ।’ स्रोत भन्छ । मुलुकमा आज पनि राजसंस्थाप्रति भक्तिभाब देखाउने जनमत निकै ठूलो छ । राजसंस्थाको अन्त्यपछि यो जनमत असंगठित छ । राजाबादी भनेर चिनिने राष्ट्रिय प्रजातन्त्र पार्टी बिभाजन हुदै छिन्न–भिन्नको अबस्थामा पुगेको छ । यस्तो अबस्थाको उक्त पार्टीले राजसंस्था समर्थित जनमतको कदर गर्न सकिरहेको छैन । समय–समयमा बिभिन्न बहानामा देखा पर्ने अभियानहरुमा यो जनमत प्रकट हुने गरेको छ । यही जनमतलाई संगठित गर्न ओली लालयित स्रोतले जनाएको छ ।

कतिसम्म भने पार्टीभित्रको संकटले ओलीको प्रधानमन्त्री पद धरापमा परेको समाचार बाहिरिएपछि यो समूह ओलीको समर्थनमा सडकसम्मै निस्किएर खबरदारी ग¥यो । यो समूहलाई सबै प्रकारले सहयोग गर्न र समान सहभागिता जनाउन बालुवाटारमा पनि दर्जनौ बैठक सम्पन्न भए । ओली सरकारको समर्थन जनाउनेहरुमा उनको समूहबाहेक राजसंस्थानिकट समूह नै सबभन्दा बढी सक्रिय रहेको सबैले प्रत्यक्ष अनुभब गरेका छन् ।

ओलीपक्षधरहरुले यिनीहरुसँग राष्ट्रबादको एजेण्डा लिएर नै छलफल गरिरहेको बताइएको छ । नेपालमा राष्ट्रबादी शक्ति र ब्यक्तिहरुलाई भारतले जहिले पनि दुःख दिने गरेको र सत्तासिन हुनबाट रोक्ने गरेको बिगत कोट्याउँदै अहिले पनि भारतले त्यही गरिरहेको भन्दै ओली पक्षधर नेताहरुले राजसंस्था पक्षधरहरुसँग सहानुभूति लिने प्रयास गरिरहेको स्रोतको भनाई छ । ‘राजसंस्था राष्ट्रबादी भएरै हट्नु परेको हो । अब पालो ओलीको आएको छ भनेर उनीहरुले कुराकानी अघि बढाइरहेका छन् ।’ स्रोत भन्छ ‘यसमा राजाबादीहरुको पनि सहमति देखिन्छ ।’

मुलुकमा राष्ट्रबादी शक्तिबिच एकता र सहमति हुनुपर्नेमा सरकारपक्षको जोड छ । ‘पार्टी, सिद्धान्त, बिचार राष्ट्रको तुलनामा गौण कुरा हो भनेर सरकारका नेताहरुको प्रस्ताबप्रति राजाबादीहरुको पूर्ण समर्थन र बिश्वास छ ।’ स्रोत भन्छ । यसरी राजसंस्थासँग निकटहरु अहिलेको ओली सरकारको समर्थक बन्न पुगेको स्रोतको दाबी छ । यति बिशाल समर्थक समूहप्रति गुण लगाउन सरकारले हिमानीलाई राष्ट्रिय सभामा लैजान चाहेको बताइएको छ । यो मुलुक र जनताको सेवा गर्ने ऐतिहासिक अबसर भएको कुरा राजाबादीहरुलाई सरकार पक्षको प्रस्ताब छ ।

शाह पूर्वयुवराज पारस शाहकी श्रीमती हुन् । राजसंस्थाको अन्त्यपछि हिमाली ट्रष्ट र राहत कोषको स्थापना गरी उनी सोही संस्थामार्फत सामाजिक कार्यमा सक्रिय छिन् । पति पारस शाहबाट अलग बस्दै आएकी उनीसँग एक छोरा र दुई छोरी साथमा रहेका छन् । उन्लाई समाज सेवामा सक्रिय बनाउने कार्यमा पूर्ब राजा ज्ञानेन्द्रको समेत साथ र सहयोग रहेको बताइएको छ । हिमानी भारतको राजस्थानको सिकरका पूर्व सूर्यबंशी राजकूलका राजा बिक्रम सिंह र रानी बिपुला सिंहकी छोरी हुन् ।

ई–आर्थिक