कञ्चनपुर । कञ्चनपुरको भीमदत्त नगरपालिकाले कोरोनाविरुद्धको खोप खरीदका लागि संघ सरकारसँग अनुमति माग गरेको छ । नगरवासीलाई कोरोना संक्रमणबाट जोगाउन नगरपालिकाले खोप खरीदका लागि स्वास्थ्य तथा जनसंख्या मन्त्रालयसँग अनुमति माग गरेको हो ।
नगर प्रमुख सुरेन्द्र विष्टले नेपाल सरकार स्वास्थ्य तथा जनसंख्या मन्त्रालयलाई पठाएको पत्रमा नेपालको पश्चिमी नाकामा रहेको यस नगरपालिकामा संक्रमणको जोखिम उच्च रहेको अवगत गराउँदै तत्काल खोप उपलब्ध गराउन र मापदण्ड अनुसार नगरपालिकालाई खोप खरीदका लागि अनुमति दिन माग गरिएको छ । कोरोना भाइरसको संक्रमण नियन्त्रण तथा रोकथामका लागि नगरपालिकाले सक्रिय रूपमा काम गरिरहेको बताइएको छ ।
नगर प्रमुख विष्टले नेपाल सरकारसँग आवश्यक मात्रामा खोप पठाइदिन आग्रह गरिएको जानकारी दिए । ‘नेपाल सरकारलाई खोपको उपलब्धताका लागि अनुरोध गरेका छौं,’ उनले भने, ‘सरकारले उपलब्ध गराउन नसकेमा तत्काल नगरपालिकालाई खोप खरीदका लागि अनुमति दिन माग गरेका छौं ।’ संघीय सरकारले अनुमति दिएमा खोप ल्याउन तत्काल खरीद प्रक्रिया अगाडि बढाइने उनले बताए ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
