पाकिस्तान विश्वकपको सेमिफाइनलमा

कार्तिक १७, २०७८

कालापानी मिडिया

एजेन्सी । नामिबियालाई हराउँदै पाकिस्तान विश्वकप टी–ट्वान्टी क्रिकेटको सेमिफाइनलमा प्रवेश गरेको छ । अबुधाबीमा गएराति भएको खेलमा पाकिस्तानले नामिबियालाई ४५ रनले हरायो ।

खेलमा टस जितेर पहिले व्याटिङ गरेको पाकिस्तानले २० ओभरमा २ विकेट गुमाएर १ सय ८९ रन बनायो । उसका लागि मोहोमद रिजवानले अविजित ७९ रन तथा बाबर आजमले ७० रन बनाए ।
जवाफमा १ सय ९० रनको लक्ष्य पछ्याएको नामिबियाले २० ओभरमा ५ विकेट गुमाएर १ सय ४४ रन बनायो । लगातार चौथो जितसँगै पाकिस्तान विश्वकपको सेमिफाइनलमा प्रवेश ग¥यो ।

हिजै भएको अर्को खेलमा बंगलादेशलाई ६ विकेटले हराउँदै दक्षिण अफ्रिकाले पनि सेमिफाइनल पुग्ने संभावना बलियो पारेको छ । समूह एक मा ४ खेलबाट ८ अंक जोडेको इंग्ल्याण्ड शिर्ष स्थानमा रहँदा समान खेलबाट ६ अंक जोडेको दक्षिण अफ्रिका दोस्रो स्थानमा छ ।

एक खेल कम खेलेको अष्ट्रेलिया ४ अंकसहित तेस्रो स्थानमा रहेको छ । विश्वकप टी–ट्वान्टी क्रिकेटमा आज दुई खेल हुनेछन् । आजको पहिलो खेलमा न्युजिल्याण्ड र स्कटल्याण्ड भिड्दा दोस्रो खेलमा भारतले अफगानिस्तानको सामना गर्नेछ । लगातार दुई खेल हारेको भारत दबाबमा रहेको छ ।

प्रतिक्रिया दिनुहोस