कैलाली । धनगढीको एक पसलमा आगलागी भएको छ । उपमहानगरपालिका–३ बिशालनगरस्थित बिएमबी सप्लायर्समा बुुधबार दिउँसो आगलागी भएको हो ।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) प्रतीक विष्टले बिएमबी सप्लायर्सको गोदाममा आगलागी भएको जानकारी दिए । उक्त सप्लार्यसको दुई सटर र पछाडीको गोदाममा आगलागी भएको थियो ।
संचालक बिष्णुप्रसाद चटौतका अनुसार गोदामको सामान सबै जलेर नष्ट भएको छ भने दुई वटा सटरमा समेत आगलागी भएको छ । चटौतले आगलागीबाट १ करोड बढीको क्षति भएको बताए । उनले बाहिर काम गरिरहेको अवस्थामा एक्कासी आगो लागेको र करोड बढीको सामान खरानी भएको दुखेसो पोखे ।
आगो लाग्ने बित्तिकै दमकलका लागि खबर गरेको भए पनि दमकल ढिलो आएको उनको गुनासो छ । समयमै दमकल आएको भए ठुलो क्षति नहुने बताए । आगलागीबाट गोदाममा भएको सबै सामान जलेर नष्ट भएका छन । क्षतिको विवरण संकलन गर्ने काम भइरहेको प्रहरीले जनाएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
