माेरङ । मोरङको बूढीगङ्गा गाउँपालिका र विराटनगर महानगरपालिकामा बिहीबार राति भएका अलगअलग दुर्घटनामा परेर दुई जनाको मृत्यु भएको छ ।
कोसी लोकमार्गअन्तर्गत बूढीगङ्गा–२ मा उत्तरबाट दक्षिणतर्फ आउँदै गरेको प्रदेश १–०४–००१ प ६४६० नम्बरको स्कुटर आफै अनियन्त्रित भएर राति ८ बजेतिर दुर्घटनामा परेको छ । सडकको बीचमा रहेको डिभाइडरमा स्कुटर ठोक्किएर दुर्घटना हुँदा चालक मोरङको उर्लाबारी नगरपालिका–४ का २६ वर्षीय सुरज खनालको मृत्यु भएको मोरङ ट्राफिक प्रमुख प्रहरी निरीक्षक चन्द्रबहादुर खड्काले बताए ।
उनका अनुसार दुर्घटनामा परेर गम्भीर घाइते भएका खनालको उपचारका क्रममा बूढीगङ्गास्थित विराट शिक्षण अस्पतालमा मृत्यु भएको हो । दुर्घटनामा मृत्यु भएका खनालको साथमा सवारी चालक अनुमति पत्र (लाइसेन्स) नभएको जानकारी खड्काले दिए । उनका अनुसार तीव्र गतिका कारण स्कुटर दुर्घटनामा परेको पाइएको छ ।
त्यस्तै विराटनगर–११ रामपुरमा ट्याक्टरको ठक्करबाट साइकल यात्रीको मृत्यु भएको छ । पूर्वबाट पश्चिमतर्फ जाँदै गरेको साइकललाई को २ त ७१३९ नम्बरको ट्याक्टरले ठक्कर दिँदा साइकल यात्री विराटनगर–११ का ३४ वर्षीय मुन्ना सहनीको मृत्यु भएको जानकारी प्रनि खड्काले दिए ।
उनका अनुसार ओभरटेक गर्ने क्रममा ट्याक्टरले साइकललाई ठक्कर दिएको हो । दुर्घटनामा परेर गम्भीर घाइते भएका सहनीको उपचारका क्रममा कोसी अस्पतालमा मृत्यु भएको खड्काले बताए ।
ट्याक्टर र चालक विराटनगर–११ का मुकेश कामतलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ । कामतले लाइसेन्स प्राप्त नगरिकन ट्याक्टर चलाउने गरेको पाइएको प्रहरीले जनाएको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
