हेटौँडा । मकवानपुरको भीमफेदी गाउँपालिकाबाट अनावरण गर्न तयारी अवस्थामा रहेको लोककवि गणेशलाल श्रेष्ठको अर्धकदको शालिक चोरी भएको छ। आइतवार अनावरण गर्ने तयारी गरिएको श्रेष्ठको शालिक शनिवार राति नै चोरी भएको हो।
विसं १९६८ मा भीमफेदीस्थित पारी बजारमा जन्मेका श्रेष्ठले ‘दुई थुंगाको फूल’, ‘मेरो पुष्पाञ्जली’ लगायत नेवारी भाषामा गीत लेखेका थिए। श्रेष्ठको भीमफेदी गाउँपालिका-६ स्थित ज्योति पुस्तकालय परिसरमा स्थापना गरिएको उक्त शालिक अनावरण गर्न आइतवार परराष्ट्रविद् हिरण्यलाल श्रेष्ठलगायत साहित्यकारको टोली भीमफेदी पुगेका थिए।
तर, उनीहरू त्यहाँ पुग्दा शालिक राखिएको ठाउँबाट रड नै दोबारेर शालिक चोरी भएको पाइएको छ। शालिक चोरी भएको जानकारी पाएपछि खोजीकार्य भइरहेको मकवानपुर प्रहरीले जनाएको छ।
भीमफेदी गाउँपालिकाको लगानीमा फोहोरा पार्क र ज्योति पुस्तकालय परिसरमा करिब पाँच लाख लागतमा शालिक स्थापना गरिएको भीमफेदी गाउँपालिकाका अध्यक्ष हिदम लामाले जानकारी दिए। लामाले श्रष्टाको सम्मान स्वरूप स्थापना गर्न लागिएको कार्यमा अवरोध पुर्याउने जो कोही भएपनि कारबाहीको दायरामा ल्याउने बताए। श्रेष्ठको २०४२ सालमा मृत्यु भएको थियो।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
