इटहरी । नेकपा (माओवादी केन्द्र) प्रदेश १ को पदाधिकारी टुङ्गो लगाउन आज (बुधबार) निर्वाचनको तयारी थालिएको छ ।
छलफल एवम् बैठकबाट सहमतिमा नेतृत्व चयन गर्न नसकिएपछि निर्वाचन गर्नुपर्ने अवस्था आएको एक नेताले बताए । पदाधिकारी टुङ्गो लगाउन गठन भएको कार्यदल, प्रदेश १ का केन्द्रीय सदस्य र नेतृत्वका आकांक्षीबीच यसअघि बसेको बैठक बिनानिष्कर्ष टुङ्गिएको थियो ।
पदाधिकारीका आकांक्षीले दाबी नछाडेपछि नेतृत्व चयनमा सहमति जुट्न नसकेको हो । नौ पदाधिकारीका लागि तीन दर्जन बढीले दाबेदारी प्रस्तुत गरेका छन् । सहमतिका लागि पुनः आज बैठक पनि बस्दै छ ।
तर बैठकमा सहमति जुट्ने सम्भावना नभएपछि निर्वाचनको तयारी गरिएको कार्यदलका एक सदस्यले बताए । यसअघि बसेको पहिलो बैठकले पदाधिकारी चयनका लागि भन्दै ५ सदस्यीय कार्यदल गठन गरेको थियो । कार्यदलमा सहमति नजुटेपछि प्रदेश १ मा कार्यक्षेत्र भएका केन्द्रीय सदस्यहरूको बैठक मङ्गलबार बसेको हो।
माओवादी प्रदेश १ को पहिलो अधिवेशन गत मङ्सिर २५ र २६ गते भएको थियो । उक्त अधिवेशनमा पदाधिकारी चयन गर्न नसकेपछि दुई सय ७१ सदस्यीय कमिटी घोषणा गरिएको थियो । पार्टीको प्रदेश १ अध्यक्षमा हर्कबहादुर लावती, शिवकुमार डाँगी र मोक्साहाङ मेन्याङ्बोले दाबी गरिरहेका छन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
