जनकपुर । प्रदेश-२ को नामाकरणका लागि प्रदेशसभामा चार प्रस्ताव पेस भएको छ । प्रदेशसभाको आठौं अधिवेशनको बिहीबार बसेको दोस्रो बैठकमा नामाकरणका लागि चार प्रस्ताव पेस भएको हो ।
बैठकमा ‘मधेस प्रदेश’, ‘जानकी प्रदेश’, ‘मध्य मधेस प्रदेश’ र ‘मिथिला भोजपुरा’ नाम पेस भएको हो । मधेस प्रदेश प्रस्ताव सत्तारुढ दल जनता समाजवादी पार्टी, नेकपा माओवादी केन्द्रबाट पेस भएको हो भने प्रमुख प्रतिपक्षी दल लोकतान्त्रिक समाजवादी पार्टीले त्यसको समर्थन गरेको छ ।
त्यस्तै सत्तारुढ दल नेकपा एकीकृत समाजवादी पार्टीको तर्फबाट प्रदेशको नाम ‘जानकी प्रदेश’ प्रस्ताव पेस गरिएको छ । कांग्रेसले ‘मिथिला-भोजपुरा’ नामको प्रस्ताव पेस गरेको छ भने कांग्रेसकै प्रदेशसभा सदस्यले राजेश्वरप्रसाद साहले ‘मध्य मधेश’ प्रदेश प्रस्ताव पेस गरेको हो ।
जसपाको तर्फबाट शैलेन्द्र कुमार यादव, माओवादी केन्द्रको तर्फबाट भरत प्रसाद साह, नेकपा एसको तर्फबाट प्रमोद कुमार यादव, नेपाली कांग्रेसको तर्फबाट शिवचन्द्र चौधरीले नामको प्रस्ताव पेस गरेका हुन् भने कांग्रेसकै राजेश्वर प्रसाद साहले ‘मध्य मधेश’ प्रदेश नामको प्रस्ताव पेस गरेका हुन् ।
नेकपा एमालेको तर्फबाट प्रस्ताव गरिएको नामाकरणको प्रस्ताव भने आज पेस हुन सकेको छैन । सभामुख सरोज यादवले शारदा थापाले नामाकरण सम्बन्धमा पेस गर्ने भनिएको प्रस्ताव कार्यसूचीबाट हटाइएको जानकारी दिए ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
