काठमाडौ । लामो समय राष्ट्रिय प्रजातन्त्र पार्टीका अध्यक्ष रहेका कमल थापा नयाँ नेतृत्वलाई सहजै स्वीकार गर्न तयार भएनन् । उनले राजेन्द्र लिङ्देनलाई सहजै नेतृत्व हस्तान्तरण पनि गरेनन् । बधाई समेत दिन निकै दिन लगाए । उनले महाधिवेशनमा पूर्व राजा ज्ञानेन्द्रको हस्तक्षप भएको भन्दै छानविन गर्न माग राखे ।
अध्यक्ष राजेन्द्र लिङ्देनलाई बधाई दिँदै उनले चार बुँदे आफ्ना माग पनि बुझाए । तर अब थापालाई थप पिरलो परेको छ । कमल थापाले बुझाएको ४ बुँदे माग पत्रमाथि सुनुवाइ नगर्ने निर्णय राजेन्द्र लिङ्देनले गरेका छन् । थापाले मंसिर २७ गते लिङ्देनलाई पत्र लेख्दै राप्रपा महाधिवेशनमा निर्मल निवासले हस्तक्षेप गरेको भन्दै त्यसउपर छानबिन माग गरेका थिए।
अध्यक्ष लिङ्देनले हिन्दु राष्ट्र र राजसंस्थामाथि पार्टीको नकारात्मक छवि बन्ने गरी कुनै पनि बहस, छलफल र निर्णय नलिने भएका हुन्। ‘राजसंस्था र हिन्दु राष्ट्रको एजेन्डा पार्टीको छ, त्यसमाथि नकारात्मक छवि बन्ने गरी कुनै पनि बहस, छलफल र निर्णय नलिने उहाँले भनिसक्नुभएको छ,’ लिङ्देननिकट नेता मोहन श्रेष्ठले भने, ‘जुन विषयवस्तुमाथि छानबिनको कुरा आएको छ, मलाई लाग्छ कुनै छलफल र निर्णय हुँदैन।’
महाधिवेशनमा पराजित भएपछि थापाले निर्मल निवासले हस्तक्षेप गरी आफूलाई हराएको आरोप लगाएका थिए। राप्रपा महाधिवेशनपछि लिङ्देनले पहिलो बैठक मंसिर २२ गते पार्टी कार्यालय धुम्बाराहीमा बोलाएका थिए।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
