काठमाडाैं । संस्कृति, पर्यटन तथा नागरिक उड्डयन मन्त्री प्रेमबहादुर आलेले संसदीय समितिहरूले दिएको निर्देशन आफूले हुवहु पालना गर्ने प्रतिबद्धता जनाएका छन् । मङ्गलवार प्रतिनिधिसभाअन्र्तगतको अन्तर्राष्ट्रिय सम्बन्ध समितिको बैठकमा बोल्दै मन्त्री आलेले समितिले दिएको निर्देशन पालना गर्ने प्रतिबद्धता व्यक्त गरेका हुन् ।
उनले सरकारी स्वामित्वमा रहेको एक सय ४८ रोपनी जग्गा तारागाउँ विकास समितिले आफ्नो नाममा पारेको र यसलाई फिर्ता गराउने सम्बन्धमा समितिले पनि निर्देशन दिएको उल्लेख गर्दै सो जग्गा फिर्ता ल्याउने प्रतिबद्धता जनाए । ‘तपाईंहरूले दिएका निर्देशन पालना गर्नेछु भन्ने म प्रतिबद्धता जाहेर गर्न चाहन्छु,’ उनले भने, ‘तारागाउँ विकास समितिको कुरा एकदमै गम्भीर छ । एक सय ४८ रोपनी जग्गा आफ्नो नाममा राखिएको छ । सरकारको अधिनमा रहेको जग्गा कुनै व्यक्ति, प्राइभेट कम्पनीमा राख्न मिल्दैन ।’
मन्त्री आलेले निजगढ अन्तर्राष्ट्रिय विमानस्थल निर्माणका लागि बजेट अभाव भएको बताए । विमानस्थल निर्माणका लागि आठ हजार ५० हेक्टर जमिन विमानस्थलको नाममा आइसकेको भए पनि बजेट अभावका कारण काम सम्पन्न हुने नसकेको उनले जानकारी दिए । त्यस्तै, पोखरा अन्तर्राष्ट्रिय विमानस्थल निर्माणको सम्बन्धमा रिठ्ठे डाँडाको कटान प्रक्रिया पनि छिट्टै अगाडि बढाइने उनले बताए ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
