काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले सरकारले पृथ्वीजयन्तीका दिन राष्ट्रिय एकता दिवस मनाए स्वागत गर्ने नत्र सरकारविरुद्ध विरोध शुरू गर्ने बताएका छन् ।
‘पुस २७ गते पृथ्वीजयन्तीलाई राष्ट्रिय एकता दिवसको रूपमा मनाइयोस् भन्ने हाम्रो माग छ । सरकारले सोहीअनुरूप निर्णय गरे, पुस २७ गतेका दिन हामी खुशीयाली मनाउँछौं । सरकारले त्यसो गरेन भने त्यही दिनदेखि सरकारको विरुद्धमा हाम्रो कार्यक्रम शुरू गर्छौं,’ राप्रपा अध्यक्ष लिङ्देनले भने ।
लिङदेनले राजसंस्था र हिन्दुराष्ट्र पूनःस्थापनाका लागि निर्वाचन र सडकको दुवै विकल्प एकसाथ सञ्चालन गर्ने पनि बताएका छन् । ‘जुन बाटोबाट हाम्रो मान्यता चाँडो स्थापित हुन्छ सोही विकल्प हामी अघि सार्छौं,’ उनले भने ।
‘यस सन्दर्भमा समान विचारधारा भएका हामीहरू एक ठाउँ उभिन जरुरी भएको छ,’ राप्रपा केन्द्रीय कार्यालय धुम्बाराहीमा आयोजित एक समारोहलाई सम्बोधन गर्ने क्रममा हिजो आइतबार उनले भने, ‘पर्ख र हेरौं भन्ने हामीसँग समय छैन, हामीलाई त्यो छूट छैन ।’
लिङदेनले भने, ‘हामीले उठाइराखेको राजसंस्था र हिन्दुराष्ट्रको मुद्दा कसै व्यक्तिलाई मन्त्री, प्रधानमन्त्री बनाउने नभएर देशको स्थायित्वको लागि हो । हामी सबैभन्दा माथि देश छ, देशभन्दा माथि केही पनि छैन ।’
सो अवसरमा शाही शक्ति नेपालका अध्यक्ष मुनिन्द्र राजभण्डारीले भने, ‘राजसंस्था र हिन्दुराष्ट्रको अभियान रानो बिनाको मौरी जस्तै थियो । तर, राप्रपाको महाधिवेशनपछि हामीले स्पष्ट नेतृत्व पाएका छौं । राप्रपाप्रति शाही शक्ति नेपालको पूर्ण साथ, सहयोग र समर्थन रहने छ ।’
राप्रपाका नेता सगुन सुन्दर लावतीले समान विचारधारा भएका समूह र शक्तिहरू एकजुट हुनुपर्नेमा जोड दिए । यसै मान्यताअनुरूप, पृथ्वीजयन्तीका दिन पार्टीले समान विचारधारा भएका समूह र शक्तिहरूसँग सहकार्य गर्ने उनको भनाइ छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
