देखाउनकै लागि भएपनि अटाेमा सवार भए प्रधानमन्त्री देउवा : ४ घण्टा पर्खाएर ५ मिनेट नबाेलि फर्किए

इटहरी । फोहोरमैला प्रशोधनबाट उत्पादन गरिएको उर्जाबाट सञ्चालन हुने सफारीको आज धरानमा प्रधानमन्त्री शेर बहादुर देउवाले उद्घाटन गरेका छन् ।उद्घाटनपछि प्रधानमन्त्री देउवा उक्त सफारी (अटो) मा पनि बसेका थिए ।

उद्घाटन कार्यक्रममा प्रदेश १ का भौतिक योजना तथा निर्माण मन्त्री हिमाल कार्की, धरान उपमहानगरपालिकाका  प्रमुख तिलक राई, उपप्रमुख तथा नेकपा एमाले केन्द्रीय सदस्य मञ्जु भण्डारीलगायत व्यक्तिहरुको सहभागिता रहेको थियो ।

भेन्चर वेष्ट टू इनर्जीले धरान उपमहानगरपालिका–६ स्थित पानवारीमा प्रशोधन केन्द्र बनाएको हो । धरान उपमहानगरपालिकाको फोहोरलाई व्यवस्थापन गर्दै फोहोरबाट ग्यास र मल उत्पादन गर्ने लक्ष्य लिएर उक्त केन्द्र निर्माण गरिएको परियोजनाका इन्जिनियर विवेक अग्रवालले जानकारी दिए ।

२० वर्षपछि धरान उपमहानगरपालिकालाई हस्तान्तरण गर्ने गरी ५० मेट्रिन टन क्षमताको प्रशोधन केन्द्र निर्माण भएको छ । यसमा उपमहानगरको कुनै पनि लगानी छैन ।

प्रशोधनका लागि प्लान्ट एउटै भए पनि चेम्बर फरक फरक छन् । १० टनमा तीनवटा चेम्बर छ । जम्मा १५ वटा चेम्बर छन् । प्रशोधन केन्द्रबाट उत्पादन भएको ग्यास धरानमा चलिरहेका टेम्पोहरुमा प्रयोग हुने बताइएको छ ।

प्रशोधन केन्द्रले दैनिक दुई हजार केजी ग्यास उत्पादन गर्ने क्षमता रहेको सञ्चालकले जनाएका छन् । दैनिकजसो ४०० देखि ५०० टेम्पोलाई ग्यास उपलब्ध गराउन सक्ने क्षमता रहेको छ ।

यता हेलिकोप्टरमार्फत धरान आएका उनले यसअघि बिहान साढे १० बजे धरान २ मा रहेको नेपाली कांग्रेस सुनसरी क्षेत्र नं. १ को नवनिर्मित पार्टी कार्यालय भवनको उद्घाटन गरेका थिए ।

पार्टी भवनको उद्घाटनको क्रममा उनले कांग्रेसको भविष्य बनाउन पार्टीमा एकता जरुरी रहेको टिप्पणी गरे । पार्टी सभापतिमा दोस्रो पटक निर्वाचित भएपछि पहिलोपटक जिल्ला भ्रमणमा निस्किएका देउवाले भने, ‘पार्टीमा भविष्य बनाउन एकता जरुरी छ, यसको सुरुआत धरानबाट हुनेछ भन्ने विश्वास लिएको छु ।’

यस्तै, देउवाले धरान ६ पानवारीस्थित निर्माण भएको फोहोर प्रशोधन केन्द्रको पनि उद्घाटन गरेका छन् । यस्तै, धरान ८ मा निर्माण भइरहेको स्मार्ट बसपार्कको पनि अवलोकन गरेका थिए ।

तीनवटा कार्यक्रममा सहभागी भएपछि मात्रै धरान उत्सवको उद्घाटन गर्न पुगेका प्रधानमन्त्री देउवाले तीन मिनेट मात्रै सम्बोधन गरेका थिए । करीब चार घण्टा पर्खिएका मानिसहरूले देउवाको तीन मिनेट मात्रै सम्बोधन सुन्दा खिन्नता भएको आशय प्रकट गरेका थिए ।