उजुरीपछि विनोद चौधरीको प्रतिक्रियाः विधानसम्मत केन्द्रीय सदस्यमा निर्वाचित भएको हुँ राजिनामा दिन्न !

काठमाडौं / नेपाली कांग्रेसका केन्द्रीय सदस्य विनोद चौधरीले विधानसम्मत निर्वाचित भएको भन्दै विरोधको कुनै अर्थ नभएको बताएका छन् । आफूविरुद्ध उजुरी परेपछि प्रतिक्रिया दिँदै चौधरीले यस्तो बताएका हुन् ।

महाधिवेशनमा विधिसम्मत प्रक्रियामार्फत् नेतृत्व छनौटका लागि भएको निर्वाचनमा आफै सहभागी हुने र निर्वाचन हारेपछि विधिसम्मत थिएन भनेर प्रश्न उठाउनु अलोकतान्त्रिक र अराजनीतिक चरित्र भएको उनले स्पष्ट पारेका छन्।

चौधरीको केन्द्रीय सदस्यको पद खारेजको माग गर्दै सिरहा क्षेत्र ३ का महासमिति सदस्य डा. सुभाषचन्द्र यादवले निर्वाचन आयोगमा उजुरी दिएका छन्। सोही उजुरीमाथि प्रतिक्रिया दिँदै चौधरीले  आफू विधिवत रूपमा केन्द्रीय सदस्यमा निर्वाचित भएको बताएका हुन्। नेपाली कांग्रेसको १४औँ महाधिवेशनको निर्वाचनमा चौधरी केन्द्रीय सदस्य (मधेशीतर्फ) दोस्रो धेरै मत २२०६ प्राप्त गरि विजय भएका थिए ।

‘महाधिवेशनमा निर्वाचन समितिले उम्मेदवारी दर्ता पछि विधिवत रूपमा दावी विरोधको समय उपलब्ध गराएको थियो । यदि म अयोग्य थिएँ भन्ने कसैलाई लागेको थियो भने त्यो समयमा किन दावी विरोध गरिएन ?’ केन्द्रीय सदस्य चौधरीले भने, ‘आफै सोही निर्वाचनमा उम्मेदवार हुने र विजय हुन नसकेपछि विधिसम्मत भएन भनेर रोईलो गर्नुको कुनै अर्थ छैन । नेपाली कांग्रेसजस्तो लोकतान्त्रिक पार्टीमा यस्तो व्यवहार अपेक्षित मानिदैंन ।’

‘यसलाई मैले मेरो राजनीतिक सक्रियताबाट आत्तिएकाहरूको मनोदशाका रूमा लिएका छुँ । मेरो सपना समृद्ध नेपाल निर्माण गर्ने हो । यस अभियानमा नेपाली कांग्रेसको नेतृत्वलाई हदैसम्मको साथ दिन म राजनीतिमा आएको हुँ। चौधरीले भने, ‘म नेपाली कांग्रेसका होनहार कार्यकर्ताहरूबाट अनुमोदन भएर केन्द्रीय सदस्य पदमा निर्वाचित भएको हुँ ।

यसैगरि निर्वाचित हुने हक हरेक उम्मेदवारलाई थियो । तर, निर्वाचनमा पराजय भएपछि निर्वाचितहरूलाई लान्छित गर्नु भनेको आम कार्यकर्ताहरुको अपमान पनि हो ।’ केन्द्रीय सदस्यमा निर्वाचित हुनुअघि चौधरी कांग्रेस महासमिति सदस्य थिए भने सांसद पनि हुन् ।'