नाेबेल मेडिकल कलेजविरुद्ध विद्यार्थीको चक्काजाम, कोसी राजमार्ग अवरुद्ध

इटहरी ।  विराटनगरस्थित नोबेल मेडिकल कलेजमा एमबिबिएसमा पढ्ने विद्यार्थीहरूले शुक्रबार कोसी राजमार्ग अवरुद्ध गरेका छन् । कलेजले अतिरिक्त शुल्क नबुझाउने एमबिबिएसमा भर्ना भएका नयाँ विद्यार्थीलाई कलेज प्रवेशमा रोक लगाएको विरोधमा विद्यार्थीहरू काेसी राजमार्गस्थित विराटनगरकाे कञ्चनबारीमा चक्काजाम गरेर सडक आन्दाेलनमा उत्रिएका हुन् ।

आन्दोलनमा अन्य राजनीति दलका विद्यार्थी नेता पनि सहभागी छन् । नेपाल विद्यार्थी संघ, अनेरास्ववियु, अखिल क्रान्तिकारी, नेकपा (एकीकृत समाजवादी)को भ्रातृ संगठन अनेरास्ववियु (समाजवादी विद्यार्थी युनियन) मोरङ र चिकित्सा शिक्षा विद्यार्थी आन्दोलन संघर्ष अभियानको सहयोगमा पीडित विद्यार्थीहरूले प्रदर्शन गर्दै चक्काजाम गरेका हुन् ।

सरकारले तोकेको भन्दा बढी शुल्क माग गर्दै विद्यार्थीलाई कक्षा प्रवेशमा रोक लगाएपछि विद्यार्थीहरू आन्दोलनरत छन् । अतिरिक्त शुल्क नबुझाएको भन्दै नोबेल मेडिकल कलेजले ८० हाराहारी विद्यार्थीलाई दुई सातादेखि कक्षा प्रवेशमा रोक लगाएको थियो । ती विद्यार्थी कक्षा प्रवेशका लागि आन्दोलनरत छन् । तिनै विद्यार्थीको समर्थनका लागि पुगेका विद्यार्थी सङ्गठनहरूले बुधबार नोबेलमा तालाबन्दी गरेका थिए ।

चक्काजामका क्रममा विद्यार्थी नेताहरूले नाेबेल कलेजले विद्यार्थीहरूकाे पठनपाठन राेकेर अतिरिक्त शुल्क बुझाउन दबाब दिएकाेप्रति आक्राेश व्यक्त गरे । विद्यार्थी संगठनहरूकाे सहयाेगमा पीडित विद्यार्थीहरूले बुधबार कलेज प्रशासनमा तालाबन्दी गर्दा पनि कलेज प्रशासनले विद्यार्थीकाे माग सम्बाेधन गर्न चासाे देखाएका छैन ।