ओलीकाे पछि कुद्दै देउवा : संसदको अवरोध हटाउन भेटेरै अनुरोध गर्ने

काठमाडौं / उच्चस्तरीय राजनीतिक संयन्त्रको बैठकमा संसदको अवरोध हटाउने बारेमा छलफल भएको छ। शुक्रवार प्रधानमन्त्री निवास बालुवाटारमा बसेको बैठकमा संसदको गतिरोध अन्त्यका बारेमा नेताहरु बिच छलफल भएको हो।

सञ्चार तथा सूचना प्रविधि मन्त्री ज्ञानेन्द्रबहादुर कार्कीले संसदको अवरोध हटाउन पहल गर्ने निर्णय भएको जानकारी दिए।'यसरी संसद अवरुद्ध हुनु हरेक हिसाबले उचित होइन। त्यसैले संसद संचालन गर्ने बारेमा पनि छलफल भएको छ,' कार्कीले भने।

बैठकमा सहभागी नेताहरुका अनुसार संसदको अवरोध हटानका लागि प्रधानमन्त्री देउवालाई ओलीलाई भेट्न नेताहरुले आग्रह गरेका छन्। ओलीलाई भेट्न देउवा सकारात्मक देखिएको नेताहरुको भनाइ छ।

कार्कीले प्रतिपक्षी दल पनि संसद खुलाउन उत्तिक्कै जिम्मेवार हुनुपर्ने बताए। 'संसद संचालन गर्नु सरकारको जति कर्तव्य छ, प्रतिपक्षको पनि त्यत्तिकै भूमिका र कर्तव्य रहन्छ। त्यसैले संसदलाई संचालन गर्नका निमित्त पहल गर्ने निणर्य भएको छ,' उनले भने।

हिजो बसेको संयन्त्रको बैठकमा संयोजक रामचन्द्र पौडेलले संसद, अदालत, एमसीसी लगायतका विषयमा बुँदागत सुझाव दिएका थिए। उनको सुझावमाथि आज छलफल  हुने बताइएको थियो। तर, आजको बैठकमा उनको सुझावबारे चर्चा भएको बारे नेताहरुले केही बताएका छैनन्। राष्ट्रिय सभाको माघ १२ गते हुने निर्वाचनका बारेमा पनि बैठकमा छलफल भएको छ।

यसअघि बुधवार नेपाली कांग्रेसका नेता तथा उच्चस्तरीय राजनीतिक संयन्त्रका संयोजक रामचन्द्र पौडेलले पनि ओलीलाई बालकोट पुगेर भेटेका थिए। पौडेलले ओली संसदको अवरोध हटाउन सकारात्मक नभएको आरोप लगाएका छन्।