विराटनगरको सञ्जीवनी हस्पिटल बन्द, चिकित्सक र कर्मचारीकाे २ करोड बढी तलब दिन बाँकी

विराटनगर । आर्थिक संकटमा परेको विराटनगरको हस्पिटल चौकस्थित संजीवनी हस्पिटल एण्ड आइभिएफ सेन्टर प्रालिले चिकित्सक र स्वास्थ्यकर्मीहरुको दुइ करोड रुपैयाँभन्दा बढी पारिश्रमिक नदिइ बन्द भएको छ ।

चार जना चिकित्सकसहित १२ जनाको लगानी रहेको संजीवनी चरम आर्थिक संकटमा परेपछि एक साता अगाडिदेखि बन्द भएको हो । यहाँका कार्यरत पाँच जना विशेषज्ञ चिकित्सक र पाँच जना मेडिकल अफिसरसहित दुई दर्जन बढी कर्मचारीले पाउनुपर्ने तलब नदिकन संचालकले हस्पिटल बन्द गरेको हो । हस्पिटलमा कार्यरत पाँच जना डाक्टरले तीन वर्षदेखि तलब पाएका छैनन् भने ९ जना चिकित्सक र स्वास्थ्यकर्मीले गत भदौदेखि तलब नपाएको गुनासो गरेका छन् ।

एक जना चिकित्सकले १० लाखदेखि ७० लाख रुपैयाँसम्म सञ्जीवनी हस्पिटलबाट पारिश्रमिक पाउनुपर्ने छ । हस्पिटलले चिकित्सकको मात्र २ करोड रुपैयाँ तलब दिन बाँकी रहेको चिकित्सकहरुको भनाइ छ । हस्पिटलले पारिश्रमिक नदिएपछि कार्यरत चिकित्सकहरूले नेपाल चिकित्सक संघ कोशीमा १९ पुसमा निवेदन दिएका थिए । उनीहरूले लामो समयदेखि सञ्जीवनी हस्पिटलमा काम गरेवापतको पारिश्रमिक नपाएको र तलब माग गर्दा पनि कुनै सुनवाइ नभएको भन्दै संघमा निवेदन दिएका थिए । ‘हामीले काम गरेको पारिश्रमिक मागेको वर्षौ भइसक्यो । काम गरेको तलब माग्दा आज दिन्छौं, भोली दिन्छौं भनेर टार्ने मात्र काम भयो । पाउनुपर्ने पारिश्रमिक अहिलेसम्म दिएको छैन । हाम्रो माग सुनवाइ नभएपछि हामी आवद्ध संघमा पाउनुपर्ने तलब दिलाइदिन हामीले संयुक्त रूपमा निवेदन हालेका हौं,’ एक चिकित्सकले भने ।

हस्पिटलका संचालहरूमा बिनायक पन्त, राजेश प्रसाईं, ओम प्रसाईं, राज कुमार मण्डल, विजय मण्डल, सुरेन्द्र रोय, डा. प्रेरणा दहाल, डा. अन्जु देव, डा. पवन पराजुली, डा. बरुण देवलगायत रहेका छन् । हस्पिटलका अध्यक्ष राजकुमार मण्डल रहेका छन् । चिकित्सकहरूले तलब नपाएको विषयमा बुझन खोज्दा अध्यक्ष मण्डल सम्र्पकमा आउन चाहेनन् ।

चिकित्सकलाई हस्पिटलमा काम नगर्न संघको आग्रह

चिकित्सक र स्वास्थ्यकर्मीहरुले काम गरेवापतको तलब नदिने सञ्जीवनी हस्पिटलमा काम नगर्न नेपाल चिकित्सक संघ कोशीले सम्पूर्ण चिकित्सक र स्वास्थ्यकर्मीलाई आग्रह गरेको छ । लामोसमयदेखि काम गर्दै आएका चिकित्सक र स्वास्थ्यकर्मीले पाउनुपर्ने सम्पूर्ण तलब नदिएसम्म कुनै पनि चिकित्सक र स्वास्थ्यकर्मीहरुलाई काम गर्न संघले सूचना जारी गरेको हो ।

संघका अध्यक्ष डा. फरवार्ड सिलवाल र महासचिव डा. राजेन्द्र चौधरीले बुधबार उक्त सूचना जारी गरेका हुन् । ‘हस्पिटलले लामो समयसम्म चिकित्सकलाई काम गरेको तलब नदिँदा समस्यामा परेका छन् । तसर्थ हालसम्म कार्यरत चिकित्सकको भुक्तानी उक्त अस्पतालले नगर्दासम्म सो अस्पतालमा काम कारवाही नगर्न सम्पूर्ण चिकित्सकहरुमा अनुरोध गरिन्छ । यस सुचना प्रकाशित भए पश्चात उक्त अस्पतालमा काम गरी समस्या उत्पन्न भएको अवस्थामा यस संघ जवाफ देही नहुनेसमेत सूचित गरिन्छ,’ जारी सूचनामा उल्लेख छ ।