मोरङ / मोरङको पथरीशनिश्चरेका एक जना युवकले कुटपिट गरेर आफ्नै पत्नीको हत्या गरेका छन् ।
पथरीशनिश्चरे नगरपालिका–२ बुद्ध चोकका ३३ वर्षीय जय शर्माले पत्नी १९ वर्षीया पूजा विकको हत्या गरेको मोरङ प्रहरीका डिएसपी मञ्जिल मुकारुङले जानकारी दिए । उनका अनुसार मादक पदार्थ सेवन (मापसे) गरेको विषयलाई लिएर उत्पन्न विवाद कुटपिट एवम् हत्याको घटनासम्म पुगेको पाइएको छ ।
जयले मापसे गरेर घरमा आएपछि पति–पत्नीबीच विवाद भएको पाइएको प्रहरीले जनाएको छ । विवादपछि जयले गत पुस ३० गते प्लाष्टिकको पाइपले पत्नी पूजालाई मरणासन्न हुने गरी कुटपिट गरेको प्रहरीले जनाएको छ ।
पतिको कुटाइबाट गम्भीर घाइते भएकी पूजालाई उपचारका लागि विराटनगरको नोबेल शिक्षण अस्पतालमा भर्ना गरिएको थियो । उनको टाउको र शरीरका विभिन्न भागमा चोट लागेको प्रहरीको भनाइ छ ।
गम्भीर अवस्थामा अस्पताल भर्ना गरिएकी उनको उपचार सम्भव भएन । उपचार हुन नसकेपछि फर्काएर घर लैजाँदै गर्दा शनिबार साँझ बाटैमा पूजाको मृत्यु भएको डिएसपी मुकारुङले बताए ।
पत्नीको हत्यामा संलग्न जयलाई पक्राउ गरेर घटनाको अनुसन्धान सुरु गरिएको जानकारी उनले दिए । घटनासँग जोडिएका थप विषय अनुसन्धानपछि खुल्दै जाने प्रहरीको भनाइ छ । प्रहरीले जयविरुद्ध कर्तव्य ज्यान मुद्दा चलाउने तयारी गरेको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
