सुनसरीमा ट्राफिक चेकिङ छलेर भाग्दा दुर्घटनामा पर्यो भारतीय कार, चार जना गम्भीर घाइते

इटहरी । ट्राफिक प्रहरीको चेकिङ छलेर भाग्ने क्रममा सुनसरीको कोसी गाउँपालिकामा बुधबार राति भारतीय नम्बर प्लेटको एउटा कारण दुर्घटनामा परेको छ । 

दुर्घटनामा परेर कारमा सवार चार जना भारतीय नागरिक गम्भीर घाइते भएका छन् । पूर्व–पश्चिम लोकमार्गअन्तर्गत कोसी गाउँपालिका–४ शिव चोकमा पश्चिमबाट पूर्वतर्फ आउँदै गरेको बिआर ११ एएस ५७२५ नम्बरको कार दुर्घटनामा परेको हो । 

तीव्र गतिमा रहेको कारलाई ट्राफिक प्रहरी पोस्ट कोसी कटानका इन्चार्ज एवम् सहायक निरीक्षक (असइ) अमृत कार्की नेतृत्वको टोलीले रोक्न खोजेको थियो । तर चेकिङलाई छलेर भागेको कार केही पर पुगेर दुर्घटनामा परेको प्रदेश १ ट्राफिक प्रहरी प्रमुख एसपी बासुदेव खतिवडाले बताए । 

उनका अनुसार चेकिङस्थलबाट फुत्किएको कारले नजिकै रहेको ट्राफिक कोणलाई राति ८ः१० बजेतिर ठक्कर दिएको थियो । त्यहाँबाट झन् तीव्र गतिमा हुइँकिएको कार पूर्वतर्फ नै जाँदै गरेको प्रदेश १–०२–०१ ख ९३४२ नम्बको ट्रकमा ठोक्किएर दुर्घटनामा परेको एसपी खतिवडाले बताए । 

दुर्घटनामा कार चालक भारतको बिहारस्थित मध्यपुर जिल्लाको बहरी ग्रामपञ्चायत–२ का ३५ वर्षीय चन्दनकुमार साह, कारमा सवार बहरी ग्रामपञ्चायत–९ का ४५ वर्षीय शशि गुप्ता, ३० वर्षीय मनोहरकुमार यादव र ग्रामपञ्चायत–३ का ३५ वर्षीय बजेन्द्रकुमार यादव गम्भीर घाइते भएका हुन् । जिल्ला अस्पताल इनरुवामा उपचार हुन नसकेपछि घाइतेहरुलाई थप उपचारका लागि विराटनगरको विराट नर्सिङ होम एवम् विराटनगर अस्पताल पठाइएको प्रहरीले जनाएको छ । 

दुर्घटना लगत्तै प्रहरीले कार, ट्रक र ट्रकका चालक मोरङको केराबारी गाउँपालिका–८ का ३५ वर्षीय केशवबहादुर खड्कालाई नियन्त्रणमा लिएर घटनाको अनुसन्धान थालेको छ । प्रहरीका अनुसार मादक पदार्थ सेवन (मापसे) गरेर चलाएका कारण चालकले ट्राफिक चेकिङ छलेर कार भगाउँदा दुर्घटना भएको पाइएको छ ।