कोरोना जोखिम : भाेजपुरमा सर्वसाधारण नै लगाउँदैनन् मास्क

भोजपुर । भोजपुर जिल्ला प्रशासन कार्यालयले कोभिड जोखिम नियन्त्रणका लागि मास्कको अनिवार्य प्रयोग गर्न जिल्लाबासीलाई आग्रह गरेको छ ।तर सर्वसाधारणले चाहिँ त्यसको बेवास्ता गर्दै पाँच रुपैयाँ पर्ने मास्कसमेत लगाएको देखिँदैन ।

भोजपुर सदरमुकाममा आज (शनिबार) पनि सधैंझैं साप्ताहिक हाट लाग्यो, जहाँ आएकाहरूलाई प्रहरीले सामाजिक दुरी कायम गर्न र मास्क प्रयोग गर्न अनुरोध गरिरहेको थियो । 

जिल्ला कोभिड व्यवस्थापन समितिको बैठकले जोखिम बढ्न नदिन १२ बुँदे आदेश सार्वजनिक गरेको छ । जिल्लाभित्र ती बुँदाको पूर्ण कार्यान्वयन हुने देखिएको छैन । सर्वसाधारण नै पटक–पटक आग्रह गर्दासमेत अटेरी बन्ने गरेकाले समस्या आउने गरेको देखिएको छ ।
 
भोजपुरका प्रमुख जिल्ला अधिकारी बासुप्रसाद कोइरालाले जारी गरेको आदेशको अन्तिममा भनिएको छ, ‘कोभिड–१९ सम्बन्धी आदेशको प्रभावकारी पालना सम्बन्धमा सुरक्षा निकायबाट नियमित तथा आकस्मिक अनुगमन गरिने छ । अनुगमनको क्रममा आदेशको अवज्ञा भएको पाइएमा सङ्क्रामण रोग ऐन २०२० र स्थानीय प्रचलित कानुनबमोजिम कारबाही हुनेछ ।’

सर्वसाधारणमा मात्र नभएर बढी भिडभाड हुने सरकारी कार्यालयमा कार्यरत कर्मचारीले समेत पूर्ण रूपमा मास्क प्रयोग गरेको पाइँदैन । हिँडडुलक्रममा मास्कको अनिवार्य प्रयोग गर्नाले जोखिम हुनबाटसमेत बच्न सकिने स्वास्थ्यकर्मीको भनाइ छ । 

जिल्ला प्रशासनबाट जारी आदेशको पूर्ण पालना गराउन आफूूहरूले समेत व्यवसायीलाई आग्रह गरेको भोजपुर उद्योग वाणिज्य सङ्घ अध्यक्ष ध्रुवलाल श्रेष्ठले बताए । पटक–पटक आग्रह गर्दासमेत बेवास्ता गरी लापरबाही गर्ने जोसुकैलाई पनि कानुनी दायरामा ल्याउनु पर्ने नेपाल पत्रकार महासङ्घ भोजपुर शाखा सचिव अर्जुन बस्नेतको भनाइ छ । 

सङ्खुवासभा उद्योग वाणिज्य सङ्घले ‘तपाइँको मास्क खोइ ?’ अभियान चलाएको छ । कोरोनाको नयाँ भेरिएन्ट फैलिँदा पनि शनिबार लाग्ने साप्ताहिक हाटबजारमा उपभोक्ता बिनामास्क आएपछि सङ्घले अभियान चलाएको हो ।

जोखिम नियन्त्रणका लागि सङ्घले मास्क अभियान चलाएको अध्यक्ष कृष्णभगत प्रधानले बताए । सङ्घले बिनामास्क हिँडडुल गरेका एक हजार जनालाई मास्क वितरण गरेको थियो । खाँदबारी नगरपालिका १ का वडाध्यक्ष निरञ्जन श्रेष्ठले मास्क उपलब्ध गराएका थिए ।