अहिलेसम्मकै सर्वाधिक फरार अपराधि पक्राउ गर्न प्रदेश १ प्रहरी सफल

इटहरी ।चालू आर्थिक वर्षको ६ महिनाको तथ्यांकलाई हेर्दा १ नम्बर प्रदेशमा फरार रहेको सूचीमा रहेका अपराधिहरू पक्राउ पर्नेको संख्या अहिलेसम्मकै सर्वाधिक रेकर्ड बनेको छ ।

प्रदेश १ प्रहरी प्रमुख अरुणकुमार बिसी आएपछि र प्रदेशका १४ वटै जिल्लाका प्रहरी प्रमुखबीचको कार्यसम्पादन सम्झौताको प्रभावकारी कार्यान्वयन हुँदा अदालतबाट दोषि ठहर भइ फैसला भएका र पक्राउ नपरेकाहरु १ हजार १ सय ६८ जना रहेको छ । यसरी पक्राउ पर्ने अघिल्लो आर्थिक वर्षभरीमा जम्मा ४ सय ७५ मात्रै थियो । पक्राउ परेकाहरुबाट ६ सय ३२ कैद वर्ष असुल भएको पनि प्रदेश १ प्रहरी कार्यालयले जनाएको छ ।

प्रहरीले उनीहरुबाट जरिमाना असुलमा पनि नयाँ रेकर्ड कायम गरेको छ । अघिल्लो आर्थिक वर्षभरीमा २ करोड ६६ लाख ५० हजार २ सय ७५ रुपैयाँ जरिमाना असुर भएको भएपनि चालू आर्थिक वर्षका ६ महिनामै त्यो भन्दा झण्डै दोब्बर जरिमाना ४ करोड २५ लाख ९० हजार ४ सय ५२ रुपैयाँ असुल भएको छ ।

प्रदेश प्रहरी कार्यालयको पुस मसान्तसम्मको रेकर्ड अनुसार हालसम्म ३ हजार ६ सय २७ मुद्दा दर्ता भएको छ भने १९ करोडभन्दा बढी राजश्व संकलन भइसकेको छ । अघिल्लो आर्थिक वर्षमा भने राजस्व संकलनको अवस्था १८ करोड ९२ लाख ८८ हजार ५ सय रुपैयाँ मात्रै रहेको थियो ।

‘संगठन प्रमुखको निर्देशनलाई पालना गर्ने र गराउनेतर्फ विशेष ध्यान दिई समाजमा हुने अपराधिक घटना, फैसला कार्यान्वयन, भन्सार चोरी निकासी, नदिजन्य पदार्थ अवैध दोहन, अवैध काठ चोरी निकाशी र ट्राफिक व्यवस्थापनमा प्रभावकारी रूपमा प्रहरी परिचाल भए अनुसार उलेख्य मात्रामा सफलता हासिल भएको हो,’ प्रदेश प्रहरी कार्यालयले जनाएको छ, ‘यस आर्थिक वर्षको गत ६ महिनामा मात्र ३ हजार ६ सय २७ वटा विभिन्न अपराध सम्बन्धी मुद्दा दर्ता भई कारवाही गरिसकिएको छ ।’

यसैगरी भन्सार चोरी निकासीतर्फ अवैध रूपमा समान चोरी निकासी गर्ने ४७ जना मानिस पक्राउ गर्नुका साथै ५ करोड ५८ लाख ८० हजार ५६७ रुपैयाँ राजश्व संकलन भएको छ । यस्तै नदिजन्य पदार्थको अवैध रूपमा दोहन गर्ने ३२ जना मानिस र ५ सय १५ वटा नदिजन्य पदार्थ उत्खनन् गर्ने र ओसार–पसार गर्ने सवारी साधनलाई पक्राउ गर्नुका साथै २० लाख १९ हजार २५० राजस्व संकलन भएको छ । यसैगरी अवैध काठ चोरी निकासी गर्ने ४२ जना मानिस पक्राउ गर्नुका साथै १९५२ क्यू.फिट. काठ बरामद गरी ४४ लाख ४ हजार ६६६ राजश्व संकलन भएको छ ।

यसैगरी ट्राफिक व्यवस्थापनतर्फ यस आर्थिक वर्षको ६ महिनामा मात्र ट्राफिक नियम उल्लङ्घन गर्ने १ लाख ३१ हजार ५७६ वटा सवारी साधनलाई कारवाही गर्दा ८ करोड ५९ लाख ६४ हजार ५ सय राजस्व संकलन भएको छ ।

यसैगरी लागूऔषध नियन्त्रणतर्फ गाँजा ३ सय ८२ किलो ८९९ ग्राम, चरेश १४ ग्राम ५०० मिलिग्राम, ब्राउन सुगर १ किलो ४२५ मिलिग्राम, विभिन्न मनोद्धिपक क्याप्सलु १० हजार ६८, मनोद्धिपक एम्पुल ३ हजार ८७५ र मनोद्धिपक औषधीहरु ४७५ क्याप्सुल नियन्त्रण गरिएको र १६६१ रोपनी क्षेत्रफलमा लगाएको ७ लाख ५१ हजार ७७८ बोट गाँजा नष्ट गरिएको प्रदेश प्रहरी कार्यालयले जनाएको छ ।