राष्ट्रियसभा निर्वाचन : प्रदेश १ मा कसको अवस्था कस्तो ?

बिराटनगर ।राष्ट्रियसभामा तीन सदस्यका लागि आज(बुधबार)  हुने निर्वाचनमा प्रदेश १ मा आठजना बीच प्रतिस्पर्धा हुँदैछ।

सत्तारुढ गठबन्धन, प्रमुख प्रतिपक्षी एमाले र राप्रपाका उम्मेदवार चुनावी मैदानमा छन् । सत्तारूढ गठबन्धन दलबाट नेपाली काङ्ग्रेसले झापाका गोपालकुमार बस्नेत , जनता समाजवादी पार्टीले अल्पसङ्ख्यक र अपाङ्ग तर्फ भोजपुरका हेमराज राई र महिलातर्फ नेकपा (एकीकृत समाजवादी)ले भोजपुरकी जयन्ती राईलाई प्रतिस्पर्धामा उतारेको छ।

सो गठबन्धनमा नेपाली काङ्ग्रेस, नेकपा माओवादी केन्द्र, जनता समाजवादी पार्टी, नेकपा एकीकृत समाजवादी,राष्ट्रिय जनमोर्चा र संघीय लोकतान्त्रिक राष्ट्रिय मञ्च छन् । प्रदेश १ मा गठबन्धनमा छ दल छन् । अन्य प्रदेश  सङ्घीय लोकतान्त्रिक राष्ट्रिय मञ्च बाहेकका पाँच दल छन् । एमालेबाट  मोरङका गुरु बराल, महिलामा झापा दमककी सुमित्रा भण्डारी र अल्पसङ्ख्यक र अपाङ्ग तर्फ सोलुखुम्बुका सोनाम ग्याल्जेन शेर्पा चुनावी मैदानमा छन् । झापाका अमरबहादुर विष्ट र  रञ्जु  प्याकुरेल राप्रपाका तर्फबाट चुनावी मैदानमा छन् ।

राप्रपाकी १ प्रदेश सांसद इन्दीरा राई,  झापाका तीन स्थानीय तहका अध्यक्ष र एक उपाध्यक्षले राप्रपाका उम्मेदवारलाई मतदान गर्दै छन् । गौरीगञ्ज गाउँपालिकाका अध्यक्ष बाबुराजा श्रेष्ठ, हल्दिबारी गाउँपालिका अध्यक्ष रवीन्द्र लिङ्देन र कचनकवल गाउँपालिका अध्यक्ष अन्जार आलम र उपाध्यक्ष निमसरी राजवंशी मतदाता हुन्। राप्रपाका सबै मतदाता झापाका हुन् । राप्रपाको मतभार एक सय २० रहेको छ। यो प्रदेशमा मात्रै राप्रपाले आफ्ना उम्मेदवारलाई मतदान गर्नेछन् ।  सत्तारुढ गठबन्धन दलको ५० जना प्रदेश सांसद र स्थानीय तहका प्रमुख,रअध्यक्ष, उपप्रमुख र उपाध्यक्ष गरी एक सय २६ मतदाता छन् । यसको कुल मतभार  चार हजार  छ सय ६८ हुन्छ । 

प्रमुख प्रतिपक्षी एमालेका प्रदेश सांसद ४१ छन् । त्यसमध्ये गुलेफुन खातुन फौजदारी मुद्दामा दोषी ठहर भएकी व्यक्ति हुन् । उनी अहिलेसम्म प्रहरीको फरार सूचीमा छन् । स्थानीय तहका प्रमुख, अध्यक्ष ,उपप्रमुख, उपाध्यक्ष गरी १४२ मतदाता छन् । यसको कुल मतभार चार हजार   पाँच  सय २४ हुन्छ । खातुन मतदानमा अनुपस्थित भए एमालेको ४८ मतभार घट्नेछ।

सत्ता गठबन्धनमा समेत  एक मत घट्ने अवस्था छ । विराटनगरकी  उपमेयर इन्दिरा कार्की मतदानमा सहभागी नहुने भएकी छन् । स्वास्थ्य समस्याका कारण उनी सहभागी नहुने भएकी हुन् । कार्की सहभागी नहुँदा सत्ता गठबन्धनकाे एक मत घट्नेछ । 

प्रदेश १ को कुल मतभार नौ हजार तीन सय १२ रहेको छ । यो प्रदेश मात्रै गठबन्धन थोरै मतभारले मात्रै अगाडि छ। मधेस प्रदेश बाहेक पाँचवटा प्रदेश पाँच दलीय गठबन्धन बलियो अवस्थामा छ। मधेस प्रदेशमा एमाले र लोकतान्त्रिक समाजवादी पार्टीले गठबन्धन गरेका छन् । आजको निर्वाचनबाट १९ जना राष्ट्रियसभा सदस्य निर्वाचित हुनेछन् ।