विराटनगर । मोरङको धनपालथान गाउँपालिका–७ कमलपुरको बस्ती नजिकै रहेको उखुबारीमा शंकास्पद दुईवटा छुट्टा–छुट्टै खाल्डामा दुई जना पुरुषको शव फेला परेको छ ।
बुधबार उखु काट्न पुगेका किसानले उखुबारी भित्र खाल्डो खनेर पुरिएको अवस्थामा शव देखेपछि प्रहरीलाई खबर गरेका थिए । बुधबार नै बेलुका उत्खनन् गरेको एउटा खाल्डोबाट प्रहरीले अन्दाजी ३०–३५ वर्षीय पुरुषको शव फेला पारेको थियो ।
झण्डै ४० मिटरको फरकमा रहेको अर्को खाल्डोमा पनि शंका लागेर उत्खनन् गर्दा अन्दाजी २५ वर्षको जस्तो देखिने अर्को पुरुषको शव पनि फेला परेको छ । उक्त शव आज बिहान उत्खनन् गरिएको हो ।
उखुबारी स्थानीय गंगा सिंहको हो । शव केही दिन अगाडिको हुनसक्ने मोरङ प्रहरीका प्रमुख एसपी जनार्दन जिसीले बताए । बरामद एउटा शव पोष्टमार्टमका लागि कोशी अस्पताल ल्याइएको छ भने अर्को शव पनि ल्याउने तयारी गरिरहेको प्रहरीले जनाएको छ ।
गाढेको अवस्थामा भेटिएको एक जना पुरुषको गोजिबाट सिमकार्ड र पर्स पनि फेला परेको छ । शव भेटिएको स्थानमा स्थानीय सर्वसाधरणको ठूलो संख्यामा उपस्थिति रहेको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
