जनगणनामा त्रुटि, हजारौँ मानिसहरूको गणना नै भएन

सुर्खेत । नागरिकहरूको यथार्थ विवरण सङ्कलनका लागि गरिएको जनगणना गरिन्छ । तर राष्ट्रिय जनगणना २०७८ ले सुर्खेतको सिम्ता गाउँपालिकामा अस्वाभाविक रूपमा मान्छे हराइदिएको छ ।

सिम्ता गाउँपालिकाले दुई वर्ष अघिमात्र अर्थात् आर्थिक वर्ष २०७५/७६ मा सङ्कलन गरेको तथ्याङ्कमा रहेका नागरिकमध्ये ६ हजार एक सय ४५ जनाको विवरण हराएको हो ।

गाउँपालिकाको वस्तुगत विवरण तथा आवधिक गाउँ विकास योजनाको लागि घरधुरी सर्वेक्षण २०७५÷७६ मा सिम्ताको जनसङ्ख्या ३० हजार चार सय ४३ थियो तर हाल गरिएको गणनाले २४ हजार दुई सय ९८ जनामात्र रहेको तथ्याङ्क सार्वजनिक गरेको छ ।

गाउँपालिकाले गरेको सर्वेक्षणको तथ्याङ्क

गाउँपालिकाभरको तथ्य–तथ्याङ्कमा ‘अब्बल’ ठानिएको सिम्ता गाउँपालिकाले हरेक नागरिकको पेशा, व्यवसाय, आर्थिक–सामाजिक अवस्था तथा अन्य सामान्य विषयवस्तुको समेत तथ्याङ्क दुई वर्षअघि नै सङ्कलन गरेको थियो । तर ६ महिना लगाएर सङ्कलन गरिएको त्यो तथ्याङ्कसँग हाल १५ दिनमा सङ्कलन भएको गणना कतै पनि मेल खाँदैन ।

गाउँपालिकाले गरेको सर्वेक्षणअनुसार सिम्तामा पाँच हजार ६ सय २२ घरधुरी रहेकोमा जनगणनाबाट एक सय ४७ घर हराएर पाँच हजार चार सय ७५ घरधुरीमात्र रहेको तथ्याङ्क आएको छ ।

राष्ट्रिय जनगणनाको तथ्याङ्क

यसैगरी, दुई वर्षपहिला महिलाको सङ्ख्या १४ हजार आठ सय ५३ रहेकोमा हाल एक हजार दुई सय ५५ घटेर १३ हजार पाँच सय ९८ जनामात्र महिला रहेको तथ्याङ्क छ भने पुरुष चार हजार आठ सय ५० जना हराएका छन् । दुई वर्ष पहिला १५ हजार पाँच सय ९० जना पुरुष रहेको सिम्तामा जनगणनाले १० हजार सात सय ४० जनामा झारेको छ ।

गाउँपालिकाले गरेको सर्वेक्षणको तथ्याङ्क

सिम्ता गाउँपालिकाका अध्यक्ष कविन्द्रकुमार केसीले आफ्नो गाउँपालिकाका जनतालाई सङ्घीय सरकारले हराइदिएको बताए । गाउँपालिकासँग सबै तथ्याङ्क स्पष्ट र पारदर्शी रूपमा छ । उनले भने, ‘कसको नयाँ बच्चा जन्मियो ? कसको मृत्यु भयो ? को कहाँ बसाइँसराइ गरेर गयो ? गाउँपालिकामा व्यक्तिगत घटना दर्ता हुन्छ । त्यसैले सबै तथ्याङ्क हामीसँग छ । जनगणनाको तथ्याङ्क यथार्थपरक छैन ।’
केसीले अब आफूले यस विषयमा तथ्याङ्क विभागसँग ‘मेरा जनता खोई ?’ भनेर प्रश्न गर्ने बताए ।