एमसीसीमा रहेको राष्ट्रघाती बुँदा हटाउनुपर्छ : जगन्नाथ खतिवडा

काठमाडौँ । नेकपा (एकीकृत समाजवादी) का उपमहासचिव एवम् प्रचार विभाग प्रमुख जगन्नाथ खतिवडाले अमेरिकन सहयोग परियोजना मिलेनियम च्यालेञ्ज कर्पोरेसन (एमसिसी)मा रहेका राष्ट्र हितविपरीत प्रावधानलाई हटाउनुपर्ने बताएका छन् ।

समाजवादी प्रेससङ्गठन नेपालको काठमाडौँ जिल्लास्तरीय प्रथम भेलालाई सम्बोधन गर्दै उनले एमसीसीमा राष्ट्रको हितमा नभएका केही राष्ट्रघाती बुँदा भए त्यसलाई हटाउनुपर्ने बताए ।

उक्त परियोजना संसद्‌मा कसरी प्रस्तुत गर्ने, सामान्य बहुमत वा दुई तिहाइ मतले पारित गर्नुपर्ने विषय प्रष्ट नभएकाले त्यससम्बन्धी कार्यविधि बनाउनुपर्ने उनले बताए ।

उनले (एमसिसी) का राम्रा÷नराम्रा दुवै पक्षलाई सन्तुलित ढङ्गले अनुसन्धान गरी यथार्थपरक विषयवस्तुलाई पत्रकारले जनतासमक्ष ल्याउनुपर्ने बताए । उहाले एमसीसीका आधारमा गठबन्धन नतोडिने दाबी गरे । प्रगतिशील पत्रकारले राष्ट्रियताको पक्षमा जनमत निर्माण गर्नुपर्ने उनको भनाइ छ ।

सङ्गठनका संस्थापक अध्यक्ष शम्भु श्रेष्ठले सङ्गठन देशैभर विस्तारका क्रममा रहेको उललेख गर्दै पत्रकारको व्यावसायिक हकहित र अधिकार संरक्षण गर्न आफू प्रतिबद्ध रहेको बताए ।

उपाध्यक्षद्वय सन्तराम बिडारी, विश्वमणि सुवेदी, महासचिव भूपराज खड्का लगायतले उक्त सङ्गठनमा आवद्ध सञ्चारकर्मीको आचरण र व्यवहार सामाजिक हुनुपर्ने, समाजप्रति जिम्मेवार, जनताको सेवा गर्ने भावना तथा चिन्तनको विकास गरी अगाडि बढ्नुपर्ने सुझाव दिएका थिए । कार्यक्रममा भीम लामाको नेतृत्वमा १७ सदस्यीय काठमाडौँ जिल्ला कमिटी गठन गरिएको छ ।