काठमाडौं । राप्रपाका पूर्वअध्यक्ष कमल थापा पक्षको छुट्टै भेला काठमाडौंमा सुरु भएको छ । चाबहिलस्थित ओमदुर्गा पार्टी प्यालेसमा सोमबार दिउँसो सुरु भएको भेलामा उपाध्यक्ष बुद्धिमान तामाङ, महामन्त्री कुन्ती शाही, रोशन कार्की, जयन्त चन्दलगायतका नेताहरू सहभागी छन् ।
भेलामा बोल्दै थापाले स्थानीय तहको चुनावको मिति घोषणा हुँदासम्म पनि आफूले अघि सारेका तीनवटा माग पूरा नभए नयाँ पार्टी दर्ताको चेतावनी दिएका हुन् ।
उनले त्यसतर्फ संकेत गर्दै तीनवटा माग पूरा गर्न नेतृत्वलाई अल्टिमेटम दिएका छन् । “स्थानीय चुनावको मिति सरकारले घोषणा गर्नुअघि सैद्धान्तिक, संगठनात्मक र व्यवहारिक विषयमा उठाइएका प्रश्न निराकरण हुँदैन भने हामीले विकल्प खोज्न बाध्य हुनेछौँ,” थापाले आफू निकटका नेताहरुसँगको छलफलमा भने ।
उनले समाधान खोजिएमा पार्टीमा क्रियाशील भएर लाग्ने बताए । थापा अध्यक्षमा राजेन्द्र लिङ्देनसँग पराजित भएका हुन् । त्यसमा दरबारको हस्तक्षेप भएको भन्दै उनले छानबिनको माग गरेका छन् ।
उक्त माग पूरा नभए नयाँ दल दर्ता गर्ने उनको चेतावनी थियो । उनले चुनावपछि निरीह र लाचार भएर बस्नुको विकल्प नहुने भन्दै त्यसपहिले नै समस्याको समाधान गर्नुपर्ने बताए । यो विषयमा पार्टीमा छलफल गर्ने लिङ्देनले प्रतिवद्धता जनाएका छन् ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
