समन्वयमा काम गर्न सचिवहरूलाई प्रदेश १ का मुख्यमन्त्री राईको निर्देशन

इटहरी । प्रदेश नम्बर १ का मुख्यमन्त्री राजेन्द्रकुमार राईले मन्त्री र सम्बन्धित मन्त्रालयका सचिवलाई एकापसमा समन्वय गरेर काम गर्न निर्देशन दिएका छन् । 

प्रदेश सरकारअन्तर्गतका मन्त्रालय तथा निकायहरूको आज (बुधबार) सम्पन्न अर्धवार्षिक समीक्षा कार्यक्रममा मुख्यमन्त्री राईले कामको सिलसिलामा कसैले कसैको राजनीतिक वाद वा सिद्धान्त नहेर्न पनि आग्रह गरे । 

‘हामीलाई चिनिया उक्तिजस्तो–बिरालो चाहे कालो होस् वा सेतो मुसा मारे पुग्छ,’ मुख्यमन्त्री राईले भने, ‘हाम्रो सरकारको योजना र उद्देश्यसँग तालमेल मिलाउनुप¥यो, कर्मचारी जो भए पनि हुन्छ ।’ 

उनले कर्मचारीलाई अनावश्यक र अनुचित काम गर्न दबाब नदिन पनि मन्त्रीहरूलाई निर्देशन दिए । मुख्यमन्त्री राईले योजना कार्यान्वयनक्रममा मन्त्रीहरूलाई असहयोग नगर्न सचिवलाई आग्रह गरे । ‘यो वा त्यो कानुनको बहाना गरेर मन्त्रीज्यूहरूलाई अलमल्याउनुभएन,’ मुख्यमन्त्री राईले भने, ‘टार्ने, पन्छिने र पन्छाउने कामले संशय पैदा गर्छ, जे कुरा हो सचिवज्यूहरूले पनि मन्त्रीज्यूहरूलाई खुला र पारदर्शी ढङ्गले भन्नुप¥यो ।’ 

उनले ऐन–कानुनका कारण गाँठो परेका विषय फुकाउन सरकार तत्पर रहेको जनाए । ‘अब जहाँ समस्या पर्छ, त्यहाँ कानुन बनाउँदै जाने हो,’ मुख्यमन्त्री राईले भने । 

कार्यक्रममा आर्थिक मामिला तथा योजना मन्त्री इन्द्रबहादुर आङ्बोले मन्त्रालय विस्तारपछि जनस्तरबाट आलोचना भएको अवस्थामा अब कार्यसम्पदानबाटै जवाफ दिनुपर्ने बताए । ‘मन्त्रालय र मन्त्री बढाएर खर्च बढाए भन्ने आरोप छ, अब राम्रो कार्यसम्पादन गरेर परिणाममुखी कामबाटै जवाफ दिनुपर्छ,’ उनले भने । 

उद्योग, श्रम तथा रोजगार मन्त्री प्रतापप्रकाश हाङ्गामले कर्मचारीलाई स्थिर सरकारको संज्ञा दिँदै जाडोमा तराई, गर्मीमा पहाड बस्न खोज्ने प्रवृत्तिको अन्त्य हुनुपर्नेमा जोड दिए । यातायात व्यवस्था तथा सञ्चारमन्त्री उपेन्द्रप्रसाद घिमिरेले प्रदेश सरकारको मुख्य राजस्वको स्रोत वृद्धि गर्न यातायात व्यवस्था कार्यालयको काम–कारबाही थप व्यवस्थित गरिने बताए ।