बिराटनगर महानगरकाे बेथिती : पोलमा गमला राख्न मन्त्री र मेयरको प्रतिस्पर्धा : प्रतिफल शून्य

इटहरी । सस्तो लोकप्रियताका लागि राजनीतिक व्यक्तिहरूले केसम्म गर्छन् ? सहजै उत्तर आउँछ, जे पनि गर्छन् । यसको एक उदाहरण हो, विराटनगरको मेनरोडमा राखिएका गमला ! 

महानगरपालिकाले मेनरोडका पोलमा राखेकामध्ये धेरै गमला अहिले हराइसकेका छन् । भएका गमलामा पनि फोहोर र सुकेको झारमात्रै देखिन्छ । महानगरले तीनपैनी चोकदेखि ट्राफिक चोकसम्म सडकको दुवैतिरका पोलमा फूलसहितको गमला राखेको थियो ।

यस्तै निर्वाचन क्षेत्र पूर्वाधार विकास कार्यक्रमअन्तर्गत केदार कार्कीले डिएसपी रोडदेखि झण्डै सातघुम्ती चोकसम्म फलामे पोलसहित राखेको गमलाको हालत पनि उस्तै छ । सहर सुन्दर बनाउने भन्दै राखिएका गमलाले थप सौन्दर्य बिगार्ने कामबाहेक अन्य केही गर्न सकेको छैन । 

पोलमा झुण्डिएका गमला हेर्दा लाग्छ, महानगरका प्रमुख भीम पराजुली र हालका आन्तरिक मामिला तथा कानुन मन्त्री केदार कार्कीको पोलमा गमला राख्ने प्रतिस्पर्धा मात्रै हो । यसरी प्रतिस्पर्धाका लागि राखिएका गमलाले के प्रतिफल दिएको छ ? हेर्दै थाहा हुन्छ, प्रतिफल शून्य छ ।

जनताले तिरेको करबाट राखिएका गमलाले करकै मजाक उडाइरहेको छ । विराटनगरलाई सुन्दर बनाउने भन्दै महानगरका मेयर भीम पराजुली, उप–प्रमुख इन्दिरा कार्की र तत्कालीन प्रशासकीय अधिकृत एकदेव अधिकारीले मेनरोडका बिजुलीका पोलमा गमलासहित फूल राख्ने अभियानको उद्घाटन गरेकका थिए । 

उनीहरूले महानगरपालिका छिर्ने गेटछेउकै पोलमा गमला राखेर उद्घाटन गरेका थिए । तर अहिले उनीहरूले उद्घाटन गरेकै पोलमा गमला छैन । महानगरले विराटनगरको सोन्दर्य बढाउन भन्दै दुई वर्षअगाडि अर्थात २०७७ साल माघमा रोटरी क्लब अफ विराटनगर डाउनटाउनसँगको सहकार्यमा फूलसहितको गमला राख्ने अभियान सञ्चालन गरिएको जनाएको थियो । 

तीनपैनी चोकदेखि ट्राफिक चोकसम्म लगभग एक सय पोलमा स्टेन्डसहित राखिएका गमला राखिएको दिनदेखि संरक्षाणको अभावमा छन् । धेरै गमला त अहिले पोलमा देखिँदैनन् । भएका गमलामा समेत अहिले सुकेको झार र फोहोरमात्रै देख्न सकिन्छ । 

यस्तै मन्त्री कार्कीले निर्वाचन क्षेत्र पूर्वाधार विकास कार्यक्रमअन्तर्गत सडकको दुवैतर्फ ३६ वटा फलामे पोल गाडेर आफ्नो नामसहित गमला झुण्ड्याएका छन् । दुई वर्ष भयो पोलमा साङ्लीसहित गमला झुण्डिएका । जुन दिन गमला राखियो त्यस दिनदेखि संरक्षणमा ध्यान नदिँदा गमलामा सुकेको झारमात्रै देख्न सकिन्छ । यतिमात्र हैन, कतिपय गमला जीर्ण भएर धराप अवस्थामा पुगेका छन् । यसले जतिबेला पनि दुर्घटनाको जोखिम निम्त्याउन सक्ने खतरा छ । 

यो सामान्य काम हेर्दा मात्रै यस्तो लाग्छ । पराजुली र कार्कीले सस्तो लोकप्रियताका लागि गरेका अन्य कामको अवस्था कस्तो होला ?