झापा । झापाको मेचीनगर ६ काँकडभिट्टा स्थित एक घरमा आगलागी भएको छ । स्थानीय पत्रकार खगेन्द्र घिमिरे दिएको जानकारी अनुसार मेचीनगर ६ काँकडभिट्टाको साठ्ठि बिघास्थित पासाङ तामाङको घरमा आगलागी भएको हो ।
आगलागी हुँदा घरमा रहेका दुई वटा ग्याँस सिलिन्डर पड्किएका छन् भने उक्त आगो सल्केर अन्य दुई घरमा समेत क्षति पुर्याएको छ । अहिले आगो नियन्त्रणमा आएको बताइएको छ ।
आगलागीको कारण खुल्ने नसेकेको इलाका प्रहरी कार्यालय काँकडभिट्टाका प्रमुख डिएसपी सुनिल सिंह दाहालले केटिएम दैनिकलाई बताए ।
मेचीनगर नगरपालिकाको दमकल नपुग्दा स्थानीयबासीहरूले सडक बन्द गरेर नगर प्रमुख र उपप्रमुखका विरुद्ध आन्दोलन गरिरहेको पत्रकार घिमिरेले बताए । उनीहरूले सडकमा टायर बाल्दै जुलुस निकालेका हुन् ।
लामो समयदेखि बिग्रेको मेचीनगर नगरपालिकाको दमकल मर्मत गरेर सञ्चालनमा आएको भए तापनि हिजो उक्त नगरपालिकामै रहेको एक चाउचाउ उद्योगमा लागेको आगो निभाएर फर्कने क्रममा चारआली बजारनजिकै पुनः बिग्रिएर थन्किएको छ ।
यसअगाडि काँकडभिट्टाकै एक जुत्ता उद्योगमा आगलागी हुँदा साढे आठ करोड मूल्य बराबरको क्षति भएको थियो । नगरपालिकाको दमकल बिग्रिएका कारण आगलागी नियन्त्रणमा लिन छिमेकी मुलुक भारतबाट समेत तीन वटा दमकल बोलाइएको थियो ।
प्रतिक्रिया दिनुहोस
Copyright © 2019 / 2026 - Kalapanimedia.com All rights reserved
