पेट्रोलियम पदार्थको मूल्य फेरी बढाउने तयारीमा आयल निगम

काठमाडाैं । अन्तर्राष्ट्रिय बजारमा पेट्रोलियम पदार्थको मूल्य बढिरहेकाले इण्डियन आयल कर्पोरेशन (आईओसी) ले बढाएर नयाँ मूल्य सूची पठाएको नेपाल आयल निगमले जनाएको छ ।

नेपाल आयल निगमका अनुसार विश्वमा कच्चा तेलको मूल्य झण्डै अमेरिकी डलर ९० देखि ९६ प्रति व्यारेल पुगिसकेको अवस्थामा इण्डियन आयल कर्पोरेशनले आज नयाँ मूल्य सूची पठाएको हो ।

आईओसीले पठाएको सूची अनुसार प्रति लिटर पेट्रोल ५.६१, डिजेल ५.६२ र हवाई इन्धनमा ४.९५ ले बढेर आएको निगम जनाएको छ । नयाँ मूल्य अनुसार निगमलाई आगामी १५ दिनमा करीब २ अर्ब ४१ करोड घाटा हुने स्थिति देखिएको पनि निगमले जनाएको छ ।निगमले चालु आर्थिक वर्षको माघ मसान्तसम्ममा करिब २४ अर्ब रुपैयाँ नोक्सानी व्यहोरेको जनाएको छ ।

आज जारी गरेको विज्ञप्तीअनुसार निगमले केही दिनमै मूल्य बढाउने बुझिएको छ । अहिले काठमाडौंमा पेट्रोलको मूल्य प्रतिलिटर १४२ रुपैयाँ, डिजेल र मट्टितेलको १२५ रुपैयाँ कायम छ । खाना पकाउने ग्यासको मूल्य १ हजार ५७५ रहेको छ ।

आइओसीले पठाएको नयाँ मूल्यसूची अनुसार पेट्रोलमा प्रतिलिटर १९ रुपैयाँ, डिजेलमा १५ रुपैयाँ ४८ पैसा र खाना पकाउने ग्यास सिलिन्डरमा प्रतिसिलिन्डर ५६० रुपैयाँ नोक्सानी रहेको बताएको छ ।

मट्टितेलमा प्रतिलिटर २२ रुपैयाँ २४ पैसा नाफा छ भने आन्तरिक तर्फको हवाई इन्धनमा प्रतिलिटर ९ रुपैयाँ ६ पैसा र अन्तराष्ट्रिय तर्फको हवाई इन्धनमा ३९ रुपैयाँ ९४ पैसा नाफा रहेको निगमका सह प्रवक्ता पुस्कार कार्कीले बताए ।