देउवासामु प्रचण्डको नयाँ शर्त, एमसीसीमा मध्यमार्ग

काठमाडौं। नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री देउवासंग आगामी तीन तहको निर्वाचनमा गठबन्धन बनाएर नै जाने ग्यारेण्टी गर्नुपर्ने नयाँ प्रस्ताव गर्ने भएका छन्।

एमसीसी पारित गराउन मध्यमार्गी बाटो खोज्ने तर त्यसका लागि निर्वाचनसम्मै गठबन्धन जानुपर्ने प्रस्ताव आज बस्ने गठबन्धनको बैठकमा राख्ने भएका छन्। तर, यस्तो ग्यारेन्टी नभएको अवस्थामा आफ्नो दलका मन्त्रीहरुलाई आवश्यकता परे तत्काल पद छोड्न तयार भएर बस्न निर्देशन दिएका छन्।

नेकपा एमालेका अध्यक्ष केपी शर्मा ओलीलाई सत्ताबाट हटाएर बालकोटको वार्दलीमा पठाउँदा बनाएको नेपाली कांग्रेससँगको गठबन्धन आगामी तीन तहकै निर्वाचनसम्मलाई टिक्ने हुनुपर्नेमा प्रधानमन्त्री शेरबहादुर देउवाले बेसमयमै एमसीसीको लफडा झिकेकाले गठबन्धनमा अप्ठेरो आएको पनि प्रचण्डले बताएका छन्।

फागुन ५ गते आफ्ना सांसदहरु तथा मन्त्रीहरुको बैठकलाई सम्बोधन गर्दै पूर्वप्रधानमन्त्रीसमेत रहेका प्रचण्डले गठबन्धानमा सहमति बेगर एमसीसी संसदमा टेवल हुनु नहुने र भए पार्टीले विपक्षमा मतदान गर्ने, एमालेको होहल्ला र नारावाजीमा टेवुल गरेर एमसीसी पारित भएको घोषणा गर्न नमिल्ने र यस्तो अवस्था आए गठबन्धनबाट पार्टी वाहिर आउने जानकारी मन्त्री तथा सांसदहरुलाई दिएका थिए।

उनले ‘आवश्यकता परे तत्काल पद छोड्न तयार हुनुपर्ने’ वाक्यांश प्रयोग गरेकाले गठबन्धन नटुट्ने र देउवासँग नयाँ समझदारी हुनसक्ने विश्वास माओवादी मन्त्रीहरु रहेका छन्।  एकमन्त्रीका अनुसार, आज अपरान्ह बस्ने सत्ता गठबन्धनको बैठकमा प्रचण्डले तीन तहको निर्वाचनसम्मै गठबन्धन गरेर जाने ग्यारेन्टी देउवाबाट खोज्ने भएका छन्।

देउवाले त्यसरी ग्यारेन्टी गरे भने एमसीसीलाई कुनै बाटो निकालेर पारित गर्न सकिनेतर्फ प्रचण्डले संकेत गरेका थिए। तर, त्यो ग्यारेन्टी नभई बलमिच्याइ गरियो भने सरकार छाडेर सडकको मोर्चामा आन्दोलन शुरु गर्ने र त्यही आन्दोलनलाई चुनावसम्म लैजाने रणनीति प्रचण्डले बनाएका छन्।

एमाले अध्यक्ष केपी ओली जसरी पनि गठबन्धन टुटाउन लागेकोले जसरी पनि गठबन्धन यथावत राख्ने चुनौति रहेको भन्दै एमसीसीमा मध्यमार्ग खोज्न सकिने कुरामा देउवालाई कन्भिन्स गराउने प्रयासमा प्रचण्ड लागेका छन्। तर, उनले भनेको मध्यमार्ग के हो त्यो भने खुलिसकेको छैन।