इटहरी । स्कुल बसको ठक्करबाट मोरङको उर्लाबारीमा बिहीबार साँझ एक जनाको मृत्यु भएको छ । उर्लाबारी–मधुमल्ला पक्की सडक खण्डमा दक्षिणबाट उत्तरतर्फ जाँदै गरेको बा १ क ५६०९ नम्बरको पशुपति इङ्लिस बोर्डिङ स्कुलको बसले उर्लाबारी नगरपालिका–१ मा ठक्कर दिँदा मिक्लाजुङ गाउँपालिका–३ का ५६ वर्षीय भक्तबहादुर श्रेष्ठको मृत्यु भएको हो । दुर्घटनामा परेर दिउँसो ४ः३५ बजेतिर गम्भीर घाइते भएका श्रेष्ठको साँझ ७ः४५ बजेतिर झापाको बिर्तामोडस्थित बि एन्ड सी अस्पतालमा मृत्यु भएको प्रहरीले जनाएको छ ।
दुर्घटनामा परेर शरीरका विभिन्न भागमा चोट लागेका श्रेष्ठलाई अरनिको अस्पताल उर्लाबारीमा उपचार हुन नसकेपछि थप उपचारका लागि बिर्तामोड लगिएको हो । श्रेष्ठलाई पैदल हिँडिरहेका बेला बसले ठक्कर दिएको थियो ।
प्रहरीले बस र चालक उर्लाबारी–४ का ६० वर्षीय हरिराज भट्टराईलाई नियन्त्रणमा लिएर घटनाको अनुसन्धान थालेको छ । पैदल यात्रीले अचानक बाटो काट्दा दुर्घटना भएको प्रहरीको प्रारम्भिक अनुसन्धानबाट खुलेको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
