इटहरी । प्रदेश नं १ सरकारका आन्तरिक मामिला तथा कानूनमन्त्री केदार कार्कीले प्रदेश सरकारले जनताका चाहाना र भावना अनुसार काम गरिरहेको बताएका छन् ।
नेपाल टेलिभिजन इटहरीद्वारा उत्पादित कार्यक्रम ‘प्रदेश प्रसङ्ग’मा बोल्दै मन्त्री कार्कीले एक सय दिनको अवधिमा अघिल्ला सरकारले ट्र्याक बाहिर लगेका सुशासनका कुराहरूलाई सहि मार्गमा ल्याएको दाबी गरे ।
‘अघिल्ला सरकारले धेरै कुराहरू ट्र्याक बाहिर लगेको थियो । त्यो कुरा मैले सरकार बाहिर हुँदा पनि प्रस्ट रूपमा राखेको हुँ । त्यस्ता त्यस्ता कुरालाई हामीले ट्याकमा ल्याएका छौँ । साथै हाम्रो मन्त्रालयमा पनि आगामी दिनमा कसरी अगाडि बढ्ने हो भन्ने कुराको रोडम्याप पनि बनाएका छौँ,’ मन्त्री कार्कीले भने ।
प्रदेश १ को नामकरणमा समेत अहिलेको सरकारले अग्रसरता लिएको उनले बताए । ‘एउटै पार्टीको दुई तिहाइ बहुमत हुँदा पनि नामकरण हुन सकेन हामी त गठबन्धनमा छौँ, त्यसका लागि हामीले स्वास्थ्य मन्त्री जयराम यादवको संयोजकत्वमा समिति बनाएका छौँ । हामीले नामकरण प्रक्रिया अगाडि बढाएका छौँ । नामकररणका लागि हामीलाई नेकपा एमालेको पनि सहयोग चाहिन्छ,’ उनले भने ।
मन्त्री कार्कीले सरकार विस्तार हुँदा खर्चले धान्न नसक्ने भनेर बाहिर कुरा आइरहेको भन्दै त्यसो नभएको बताए । ‘बाहिर जसरी कुरा आएको छ । त्यसो हैन, मन्त्री भनेको सांसद नै हुने हो । सांसदले पनि तलब पाएकै हुन्छन् । मन्त्री हुँदा त्यसमै केही रकम थप्ने मात्र हो । भएकै कर्मचारीले मन्त्रालय चलाउने हो । मन्त्रीलाई गाडी नयाँ किनिएको छैन । पुराना गाडी नै प्रयोग गरिएको छ । सरकार मितव्ययी बनेर काम गरिरहेको छ,’ उनले भने ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
