काठमाडाैं । नेपाली कांग्रेसका महामन्त्री गगन कुमार थापाले सत्तारुढ दलहरुले अमेरिकी सहायता परियोजना (एमसीसी) को विपक्षमा मतदान गरे गठबन्धन भत्किने बताएका छन्।
मंगलबार दिउँसो चितवन पुगेका महामन्त्री थापाले भरतपुर विमानस्थलमा पत्रकारसँग कुरा गर्दै थापाले सदनमा पेश गरेको एमसीसीको विपक्षमा मतदान भएमा गठबन्धनको औचित्य सकिने बताए।
‘गठबन्धनमा सहभागी भएर त्यही सरकारले ल्याएको प्रस्तावविरुद्ध मतदान गरिसकेपछि हामी विपक्षमा मतदान गर्छौ तर बाँकी कुरामा सँगै जान्छौं भन्ने कुरा अनैतिक र अराजनीतिक हुन्छ,’ थापाले भने।
महामन्त्री थापाले मतदानको बेला पेट दुख्यो भनेर घर बस्नेहरु अर्को दिन ठीक भयो भनेर गठबन्धनमा फर्किए सँगै बस्न नसकिने स्पष्ट पारे। ‘एमसीसीको पक्षमा मतदान गर्ने भए सँगै बसौँ। विपक्षमा मतदान गर्ने भए सँगै बस्न सकिँदैन,’उनले भने।
एमसीसीलाई यसअघिका सबै कम्युनिष्ट सरकारले अगाडि बढाएको भन्दै अहिले त्यसको विरोध गर्नु जायज नहुने उनले बताए। ‘कि भन्न सक्नुपर्यो त्यसबेला निर्णय गर्दा हामीले ठूलो अपराध गर्यौँ, भूल गर्यौँ’, उनले थपे।
उनले एमसीसीलाई लिएर सडकमा आशंका व्यक्त गरिएका विषयमा व्याख्या गर्दै सन्धिका रुपमा संसदबाट पारित गर्न सकिने विकल्प रहेको बताए।
त्यहीअनुसार एमसीसीलाई पास गर्नुपर्ने थापाले बताए। उले केही दलले चुनावपछि एमसीसी अघि बढाऔं भन्नु दोहोरो चरित्र देखाउनु बाहेक अन्य केही नभएको जिकिर गरे।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
