काठमाडौं । राप्रपाले ६ मध्ये ४ महानगरपालिका र नगरपालिकाको उम्मेदवार टुंगो लगाएको छ। राप्रपा प्रवक्ता मोहन श्रेष्ठका अनुसार काठमाडौंमा कलाकार मदनदास श्रेष्ठ, ललितपुरमा अष्ट महर्जन, वीरगन्जमा पत्रकार गिरिश गिरी, पोखरामा शंकर खराल मेयर पदको उमेदवार तय भएका छन्।
गिरीका पिता गोपाल गिरी वीरगन्ज नगरपालिकाका मेयर थिए। चन्दा नदिएको अभियोगमा माओवादी कार्यकर्ताले उनको हत्या गरेको थियो। राप्रपाले उपमेयरहरूको पनि टुंगो लगाएको छ। जसअनुसार विनिता मगैया काठमाडौं, स्वर्णिमा शाक्य ललितपुर, बिना जयसवाल वीरगन्ज, रञ्जना सेन पोखरा छन्।
बाँकी २ महानगरको चाँडै टुंगो लगाइने प्रवक्ता श्रेष्ठले जानकारी दिए।
दलहरू यही वैशाख ३० गते हुने स्थानीय तह निर्वाचनका लागि आज वा भोलिसम्ममा उमेदवार टुंगो लगाउनैपर्ने दबाबमा छन् । निर्वाचन आयोगले वैशाख ११ र १२ गते उमेदवारको मनोनयनपत्र दर्ताका लागि समय निर्धारण गरेको छ ।
प्रतिक्रिया दिनुहोस
Copyright © 2019 / 2024 - Kalapanimedia.com All rights reserved
