१७ एसएसपी डीआईजीमा बढुवाः एक नम्बरमा बसन्त कुँवर

काठमाडौं । नेपाल प्रहरीका १७ एसएसपी डीआईजीमा बढुवा सिफारिस भएका छन् ।

बढुवा सिफारिस समितिको बुधबार बसेको बैठकले १७ एसएसपीलाई डीआईजीमा बढुवा सिफारिस गरेको हो ।

काठमाडौं उपत्यका अनुसन्धान कार्यालयमा कार्यरत एसएसपी बसन्त बहादुर कुँवर एक नम्बरमा डीआईजीमा बढुवा सिफारिस भएका छन् ।

यस्तै मानव बेखविखन अनुसन्धान ब्युरोमा कार्यरत टेक प्रसाद राई दोस्रो र तेस्रो नम्बरमा कार्य विभाग कार्य निर्देशनालय नक्सालमा कार्यरत अशोक सिंह बढुवा सिफारिस भएका छन् । चौथो नम्बरमा एसएसपी दीपक थापा, पाँचौँ नम्बरमा श्यामलाल ज्ञवाली, छैटौँमा किरण बज्राचार्य र सात नम्बरमा सन्दिप भण्डारी डीआईजीमा बढुवा सिफारिस भएका छन् ।

यसैगरी जिल्ला प्रहरी परिसर काठमाडौंका प्रमुख सुदिप गिरी आठौँ नम्बरमा बढुवा हुँदा मिरा चौधरी नवौँ नम्बरमा बढुवाको सिफारिसमा परेकी छिन् ।

प्रहरीमा २० डीआईजीको दरबन्दीमध्ये १७ पद रिक्त थियो । १९ वैशाखमा तत्कालीन प्रहरी महानिरीक्षक आईजीपी शैलेश थापा क्षेत्रीसँगै १२ जना डीआईजीले ३० वर्षे सेवा अवधिका कारण अनिवार्य अवकाश पाएका थिए । त्यस्तै केही समयअघि पाँच जना डीआईजी प्रहरी अतिरिक्त महानिरीक्षक एआईजीमा बढुवा भएपछि रिक्त डीआईजीको दरबन्दी १७ पुगेको थियो ।

डीआईजी बढुवा ढिलो हुँदा मधेस प्रदेश, लुम्बिनी र सुदूरपश्चिम प्रदेशबाहेक अन्य चारवटा प्रदेश प्रहरी कार्यालय निमित्त प्रहरी अधिकारीको भरमा छ । डीआईजीहरू मोहनकुमार आचार्य सुदूरपश्चिम प्रदेश, मसाउद आलम खाँ मधेस प्रदेश र नलप्रसाद उपाध्याय लुम्बिनी प्रदेश प्रहरी प्रमुख छन् ।

 

आईजीपी धीरजप्रताप सिंह प्रहरीको ३० वर्षे सेवा हदका कारण चैतमा अनिवार्य अवकाशमा जाँदैछन् । त्यसपछि अहिले डीआईजी बढुवा भएकामध्येबाट एक जना आईजीपी बन्नेछन् ।